Ramsey leh Juventus an inṭhen

Aaron Ramsey chuan Juventus a chhuahsan dawn tih a chiang ta. Wales midfielder hian Old Lady tan season khat daih contract la nei mah se, manager Massimiliano Allegri-a ruahmannaah a tel loh avangin a tan chhuah a ṭha zawk.

Ramsey hian 2019 khan Arsenal tana a contract hmang zoin Juve hi a zawm. Italian club-ah hian kar khatah £400,000 zet a hlawh nia sawi a ni a, player hlawh hnem zinga mi a ni phak - mahse khelmual chhungah erawh beisei a phak lo.

Season hmasa chawhnu lam pawh khan Scottish club Rangers lamah loan hmangin a lo khel tawh a, kumin tawp lamah Qatar World Cup khelh hmabak a nih avangin club huanga a inkhelh phakna tur a ngaihtuah a ngai ang.

Theihna nei sang tak ni mah se hliamin a tlak buak ve fo, a vanglai a pelh ve tawh bawk avangin a tan club lian zawm ngawt a fuh lo thei. Kum 31 mi hi tun hma lama a khelh tawhna Cardiff City nen an sawizawm, thu chiang erawh a la awm lo thung.

Allegri enkawl Juventus hi season thar inbuatsaihin United States-ah an awm mek. An zinnaah hian Ramsey bakah Federico Chiesa, Mattia de Sciglio, Kaio Jorge, Arthur Melo, Marko Pjaca leh Adrien Rabiot te pawh an tel lo.

Player dangte hi chu hliam leh harsatna dang vang a ni a, midfielder Ramsey erawh chhawr zui an tum loh vang a ni thung. Arsenal player hlui hian season tharah chuan club thar a nei ngei dawn.