Champion lai Manchester City an la ṭha reng

Football season thar a hnai, season khuh hawn nana hman Community Shield pawh July 30, Inrinni zan hian Premier League champion lai Manchester City leh FA Cup champion Liverpool ten an khel dawn a, en a châkawm tawh hle.

Premier League bik tan nipui transfer bazar hi September 1, Ningani zan dar 3:30-ah a tawp dawn a, September 2, Zirtawpni zan tipawhin a sawi theih ang. Transfer hun a la tawp miau loh avangin team dinhmun dik sawi thiam a la har a, chutichung chuan team kalhmang erawh a hriat theih ṭan.

Ngaihdan nei Pep
Khawvel manager ropui zinga chhiar tel reng tawh tur Pep Guardiola hian ngaihdan nghet tak a nei a, Barcelona leh Bayern Munich a enkawl laiin Premier League-a hlawhtlin ring lo an ṭhahnem.

Mahse, hei kum ruk chhung Man City a enkawl tawh a, Jurgen Klopp hnuaia Liverpool vanglai a tawng chungin league-ah vawi li a champion tawh. League bakah FA Cup, League Cup leh Community Shield chhiar tel phei chuan nomawi 11 a chawi tawh.

Pep Guardiola hian champion zawn chungchangah ngaihdan nghet tak a nei, Spanish manager hian champion zawn tur chuan squad ngai reng a theih loh a, thlak a ngai a ti. Pep chuan, "Premier League nomawi paruk i chawi khan in squad a ngai reng lo ang.

"Player ngai reng chuan champion reng hi a theih loh tluk a ni. Mihring hi kan danglam zel. Kan chak loin kan danglam a, ka chakin kan danglam bawk. A tirah chuan khelh loh pawhin an pawm mai a, a hnuah chuan khelh loh reng chuan an pawm thei lo," tiin nikum May thlaa Ferdinand-a'n a kawm ṭumin a sawi.

Man City hian player pawimawh ni pha Gabriel Jesus leh Oleksandr Zinchenko te chu Arsenal lamah an chhuah a, Raheem Sterling-a'n Chelsea a zawm. Player hralhna zawng zawng aṭanga an sum hmuh hi pound maktaduai 164.35 a tling pha hial. Brazilian midfielder Fernandinho chuan a contract a pawtsei lo a, academy player ṭhahnem tak an chhuahtir tel bawk.

Tun season-ah Man City thar an inlan dawn a, khawvel striker langsar Erling Haaland bakah English midfielder ṭha mi Kalvin Phillips an lalut. Player lakluh nan hian pound maktaduai 93.2 seng mah se an player chhuahtir aṭanga teh chuan an la hlawk. Man City hian Ederson thachang dawl turin a thlawnin Arminia Bielefeld aṭangin German keeper Stefan Ortega an la bawk.

Pep leh Haaland
Pep Guardiola hian out and out striker a hmang meuh lo a, Barcelona a awm laiin Samuel Eto'o a chhuahtir a, Man City-ah Sergio Aguero a chhawr tam tawk lo. Chutihrualin Bayern Munich-ah erawh Robert Lewandowski a nei a, Polish stiker hian Pep hnuaiah hian match 100 khelin goal 67 a khung. Hansi Flick hnuaiah Lewy hian match 71-ah goal 83 a khung a, Julian Nagelsmann hnuaiah match 42-ah goal 46 a khung a, a khelh zat aiin a khung tam.

Spanish manager hnuaiah Lewy a vul tawk lo a, Zlatan Ibrahimovic chuan, "Ferrari i lei a, Fiat angin i khalh si," tiin Pep-a'n a theihna anga a chhawr loh thu a sawi. Mahse, Pep pawhin hma a sawn zel a, a hnuaia Barca khelh dan leh Man City khelh dan chu inang lai awm mah se a danglam lai a tam zawk.

Pep hian out and out striker ṭha chu a duh tih nikum nipui bazar khan a lantir a, England captain Harry Kane chu sum ṭhahnem tak nen hel mah se an hlawhchham. Kuminah erawh Kane ang thoa striker ṭha Haaland chu hma takah an lalut a, manager ṭha leh striker ṭha hi an inkawp rem a rinawm zawk.

Norwegian striker hian Bayern Munich nen friendly match an khelh ṭumin minute 40 a khel a, chakna goal a khung bakah defender mangchhia a ni dawn tih a pholang. Haaland hian tlarhma lamah ball chan loh laiin pressure a pe ṭha a, Man City midfielder leh defender-ten a ṭul huna ball vawrhna tur striker an neih avangin a khat mawi tawkin ball an vawrh bawk.

Borussia Dortmund striker hlui hi kum 22 mi chauh a ni chungin goal khung theih vangin a lar tawh. Bundesliga-ah pawh season hnih leh a chanve chhungin goal 62 a khung tling. Hriat tel atana ṭha erawh German club ṭha ber dawttuah a khel ṭhin a, tunah erawh Premier League club ṭha berah a khel tawh dawn a, a ke a hmui khawp ang.

Man City hian Haaland bakah River Plate aṭanga an lakluh Julian Alvarez te an kawl a, Brazilian forward Kayky te pawhin tun season-ah minute tam zawk an nei thei ang. City tlarhma hi a 'thar' tihin a sawi theih a, chutihrualin Pep-a enkawl an nih miau avangin insiamrem turin hun an mamawh rei a rinawm loh.

KDB a la tel
Man City-in player pawimawh Kevin de Bruyne an la kawl reng a, Belgian midfielder hian hma a sawn zel emaw tih theih turin a hmuhnawm tulh tulh. Friendly match-ah pawh KDB hian Club America 2-1 a an hneh ṭumin goal hnih a khung.

Midfield ti chak turin Rodri a la awm a, Bernardo Silva, Phil Foden leh Riyad Mahrez te hi Pep-a hman thiam sa vek an ni. Jack Grealish-a'n season hnihnaah hmun pawimawh a chan lehzual a rinawm a, player thar Kalvin Phillips hian World Cup kuma a club khelhna a sawn duh chuan khelhna hun tam zawk an peah a ngaih theih bawk.

Tlarhnung lamah mamawh dana vei leh dinga hman theih Joao Cancelo a pawimawh leh dawn a, Kyle Walker a la ṭha reng a, Ruben Dias hoin tlarhnung an ti phui dawn. Mahse, City hian Zinchenko an chhuahtir miau avangin squad tih chhan nan tlarhnung player an la lak a ṭul dawn. Brighton defender Marc Cucurella chu City nen sawizawm mek a ni a, Spanish defender hian Etihad Stadium a pan ta a nih pawhin a kal har hret avangin insiamrem nan hun a mamawh rei hret ang.

Goalkeeper-ah erawh buaina a awm lo - Man City tan chuan Ederson aia ṭha an awm lo a, Brazilian keeper ke hmang thiam hian tun season-ah pawh goal ven hna a pawimawh a chelh leh ang.