Premier League-in hmeichhe chair nei dawn

European football-a league ngaihven hlawh bera chhal ngam Premier League chuan kum 2023 aṭangin Alison Brittain chuan English top flight league chairman hna a thawh dawn thu an puang a, kum 57 mi British nu hi Premier League-a hmeichhe chair hmasa ber tur a ni ang.

Whitbread PLC CEO ni lai Brittain chuan, "Naupan tet aṭanga football ngainatu ka ni a, Premier League chair ni tura ruat ka ni hi ka lawm takzet a ni. Football hi kan ram tana pawimawhna thuk tak nei a ni a, khawvel hmun hrang hrangah ngainat a hlawh em avangin khawtlanga danglamna thlen thei khawp infiamna a ni.

"Football hmasawn zelna tur atana tha ka thawh ve thei tur hi ka lawm a, football-a mi pawimawh tak takte nena he game hlawhtlin zel dan tur kan ngaihtuah ho thei tur hi ka hlim a ni," a ti a, chair lailawk Peter McCormick chu a thlak ang.

Brittain hian Premier League board-ah BBC-a non-executive director Mai Fyfield, British Business Bank, Halma PLC, BBC Commercial Holdings leh Rathbones PLC-a non-executive director Dharmash Mistry leh Premier League chief executive Richard Masters te nen an thawk ho dawn a, board member tur pakhat an la lak belh leh ang.

Premier League Board hna langsar zingah, inelna zahawmna vawnhim te, league inkaihhruaina duan leh buaina chinfel te, thil pawimawh bika club-te tana thurawn pek tel.