Alisson a lo kir hnai

Liverpool boss Jurgen Klopp chuan a goalkeeper chawl mek Alisson Becker chuan dam lam a pan thu a sawi a, nizana Rb Salzburg nen friendly match an khelhah erawh a la inlan thei lo thung.

Reds hian an pre-season match hmasa berah Manchester United chu 4-0 in an ngam lo a, he inkhelah hian Alisson hian a pum lamah harsatna a tawk a, a hnuah Reds tan a inlan leh tawh rih lo.

Liverpool forward Diogo Jota chu pre-season tour neia an zinchhuah ṭantirhin, training-naah a hliam neih tawhna sa a malpuiah a inhliam leh a, Crystal Palace nen an inkhelh ṭumin Alex Oxlade-Chamberlain chu a inhliam bawk.

Klopp chuan, "Jota chu kan bulah a awm rih lo a, tuna kan bula awm zingah chuan Alisson hi a lo kir a hnai tawh ber ang. Salzburg chu a hmachhawn thei dawn lo chiang a, mahse, a lo kir hnaih tawh ka ring," a ti.

Liverpool hian Inrinni zan dar 9:30-ah Community Shield chu Manchester City nen khelin season an ṭan dawn a, he inkhelah hian Alisson hi inlan hman tawh tura beisei a ni.

Reds hian United an ngam loh hnuah Palace (2-0) leh RB Leipzig (5-0) chu pre-season tour-ah an hneh leh tawh a, Community Shield-a City an hmachhawn zawhah Strasbourg nen July 31-ah friendly match an khel leh ang.

Hetihlai hian Jota chu season thara Reds match hmasa lamah chuan inlan hman lo tura ngaih a ni a, Community Shield bakah August 6, tlai dar 5:00-a Fulham nen season bul an ṭan hunah pawh a inlan a beiseiawm loh zawk.

Oxlade-Chamberlain dinhmun pawh chiang taka sawi a harsa a, Klopp-a'n, "A chawlh chen tur ka hre lo," tia a sawi hnuah Reds-in Ox chungchangah chanchinthar an la nei leh rih lo.