Ten Hag vangin United ka zawm - Eriksen

Manchester United player thar Christian Eriksen chuan Red Devils coach Erik ten Hag chu Old Trafford a pan theih nan a pawimawh hle niin a sawi a, Ajax coach hlui nen an inbiak hnuah United zawm tura thutlukna a siam thu a sawi.

Eriksen chuan, "Ten Hag nen kan inbia a, football-a a duh dan leh ngaihdante ngaihthlak kha a nuam a, ani nena kan inbiakna avang khan United zawm tura thutlukna siam kha a awlsam lehzual a ni," a ti.

Kum 30 mi Eriksen hi a contract hman zawhna Brentford chuan cham turin an thlem a, a club hlui Tottenham Hotspur-in lakluh duh bawk mah se Manchester United zawm a thlang a, Old Trafford-ah kum thum cham turin contract a ziak.

Eriksen chuan, "He hmunah hian he club logo tan chauha lokal ka ni lo a, football khel tur lokal ka ni a, inkhelh ka duh. Ka khelh dan hi Ten Hag-a duhdan nen a inmil ka beisei a, a ṭha zawngin hna a thawh ngei ka beisei," a ti.

United hian pre-season tour an hmang ṭha hle. Liverpool (4-0), Melbourne Victory (4-1) leh Crystal Palace (3-1) hneh tawhin, Aston Villa (2-2) an inhnehtawkpui a, Eriksen erawh a la inlan lo.

Red Devils hian Inrinni, tlai dar 5:15-ah Atletico Madrid chu Oslo, Norway-ah friendly match an khelhpui ang a, England-ah kir zuiin, July 31, zan dar 8:30-ah Rayo Vallecano an hmachhawn leh ang.

Coach thar Erik ten Hag hnuaia United fiahna hmasa ber erawh August 7, zan dar 6:30-ah a ni dawn a, Red Devils hian an league match hmasa ber atan Brighton & Hove Albion an mikhual dawn a ni.