PSG-ah Mukiele; beiseina nen season thar an thlir

French champion Paris St-Germain-in nipui transfer-ah a khat tawkin thawm an nei ve reng a, defender Nordi Mukiele chu RB Leipzig aṭangin an lalut ve leh ta.

Kum 24 mi defender hian Paris khawpuia cham turin kum nga chhung atan contract a ziak a, a man zat tarlan ni lo mah se euro maktaduai 10 man bawr vel nia tarlan a ni a, a khelh ṭhat dan a zira euro maktaduai ruk la pek belh leh tur a ni.

PSG-in nipui transfer-a an player lakluh thar palina a ni a, season hmasa nena khaikhin a ralah erawh chuan French club hian player langsar vuka sawi lakluh sawi tur an la nei lo.

Paris khaw club hian season hmasa nipui transfer-ah khan loan-te nena chhiar telin player pasarih ngawt an lalut a, an zingah Lionel Messi, Sergio Ramos, Gianluigi Donnarumma, Achraf Hakimi leh Georginio Wijnaldum te an tel a ni.

Mukiele chu
PSG player thar Mukiele hi French niin, Ligue 2 club Laval leh Ligue 1 club Montpellier tan a lo khel tawh a, France tan age level hrang hrangah inlan tawhin, September 2021 khan senior team tana a match hmasa ber a khel.

Hei vang hian Mukiele hi PSG-ah a mikhual dawn lo - kum 24 mi chauh a la nih avangin hmabak êng tak a nei a, right back-a khel ṭhin niin, a ṭul dan a zirin centre back-ah chhawr theih a ni tel bawk.

RB Leipzig-ah season li a khelh chhungin match 146 khelin goal 10 a khungsak a, assist vawi 11 a nei bawk. Season hman zawh takah khan a club hi DFB-Pokal-ah champion nomawi a chawipui.

Tun hnaia an duh zawng player lalut hleithei lo Chelsea pawhin Mukiele hi lakluh an duh nia sawi a ni a, mahse, a tawpah chuan PSG zawkin an chang.

PSG beiseina
Mauricio Pochettino-a'n league-ah champion nomawi chawipui mah se PSG duh chu Ligue 1 nomawi ni loin Champions League a ni a, European football-a champion pui thei lo coach hi an ban.

Argentine coach hmun ruak luah turin Christophe Galtier an lalut zui a, kum hnih chhung atana an lakluh coach hian European football-ah tawnhriat ṭha erawh a nei chuang lo thung.

French coach hi 2020-21 season Ligue 1-a rin loh taka Lille champion pui thei coach kha a ni a, a theihna aṭanga teh chuan PSG-in a chunga 'risk' an la ngam hi thil mak a ni hran lo.

Kum 55 mi coach hi player langsar la enkawl ngai lo a ni a, Lionel Messi, Neymar leh Kylian Mbappé te kaihhruai hna a thawk dawn a ni a, eng ang takin nge a kaihhruai dawn, hriat a châkawm ta hle.

A hming Mendes

PSG hian Mukiele hma hian Nuno Mendes,Vitinha leh Hugo Ekitike an lalut tawh a, European club lian dangte nen na taka inchuh player an nei lem lo - Mendes erawh player en bik ngai a ni.

Kum 20 mi Mendes hian season hmasa khan PSG-ah hian loan-in a lo khel tawh a, a contract-ah hian a ngheta lakluh theihna a awm avangin French club hian Sporting Lisbon aṭangin euro maktaduai 38-in an lei.

Mendes hi kum 20 lek ni mah se Portugal tana vawi 15 ngawt inlan tawh a ni a, Ligue 1-a a season hmasa berah team of the year-ah a lang nghal bawk.

PSG a zawm hma hian Sporting Lisbon tan season hnih a khel hman bawk a, a kum zat ngaihtuahin tawnhriat a nei ṭha a, Portuguese right back hi tun nipuiah chuan PSG tan 'big signing' tia chhal ngam a ni.

Player dang
PSG-in Mendes hnua tun nipui transfer-a an lakluh hmasa ber chu Vitinha a ni a, kum 22 mi midfielder hi Porto aṭangin euro maktaduai 41.5-in an lalut a, kum nga chhung atan contract an ziahpui.

Vitinha hian 2020-21 season pawh kha Wolverhampton Wanderers-ah loan-in a lo khel tawh a, season hmasa khan Porto tan match 47 khela goal li khungin assist vawi nga a nei a, Primeira Liga Best Young Player of the Year-ah thlan a ni a, Porto tan league nomawi vawi hnih a chawi tawh bawk.

Reims aṭanga an lakluh Ekitike hian season hmasa khan match 26-ah goal 11 a khung a, assist vawi nga a nei bawk. Kum 20 mi striker hi season khat chhung atan loan-in an hawh phawt a, season tharah an duh chuan €35mtd-in a nghetin an lalut thei ang.

PSG-in Mukiele an lalut leh ta bawk a, nipuia an player lak danah hma hun an thlir lawk tih a lang - player thar palite hi kum 25 hnuai lam vek an ni a, an zinga upa ber Mukiele hi kum 24 mi a ni.

A pawi lo
Transfer bazar-a PSG sum sen ṭhin dan chu football ngainatute hriat sa a ni - mahse, tun season-ah erawh hming langsar lam thlir loin, kum naupang tê tê an lalut a, engin nge an rilru thlak, tih hi zawhna awm thei langsar tak a ni.

Chhanna tam tak awm thei zingah coach thar Galtier hian player langsar ngah tawk tawhah a inngai a ni thei a, coach tuaitir tam tak angin hming langsar ai chuan hmabak nei êng player enkawl a châk zawk a ni thei.

Chutihrual chuan PSG hian Real Madrid pan tur anga sawi Mbappe chu sum tam tham takin an chelh tih hriat a ṭha a, French forward hian thuneihna sang tak a nei bawk niin khawthlang media-te chuan an tarlang.

Hei vang hian 'kei ka ni' inti chin player-ten, player thu tak awmnaa khelh an châk lo a ni ve thei bawk - Messi, Neymar leh Ramos an la awm zui!

Pre-season
PSG hi pre-season duhawm tak hmang zo hlim an ni - an match hmasa berah Ligue 2 club Quevilly-Rouen chu 2-0 in an hneh a, hemi hnu hian France chhuahsanin Japan an pan zui.

Japan-ah hian Kawasaki Frontale (2-1), Urawa Red Diamonds (3-0) leh Gamba Osaka (6-2) te hnehin tlawm an nei lo a, goal 11 ngawt khungin an lamah goal thum a lut thung.

PSG hian goal khung tur chuan harsatna an nei lo tih a lang a, a bik takin tlarhmaah Messi, Neymar leh Mbappe che vel chu hmuhnawm a tling a, European club defender-te tan erawh a hmuhnawm lo mai thei!

Chiang taka lang erawh coach Galtier-a'n tlarhnung phui dan a ngaihtuah a la ngai tih a lang a, Japanese club laka goal thum chhuahtute hi European club lian an tum hunah rin ngam an harsa mai thei - PSG hian July 31, zan dar 11:30-ah Nantes nen Trophee des Champions nomawi inchuhin season bul an ṭan ang.