Bayern-in Mathys Tel an la lut

German champion Bayern Munich chuan kum 17 mi Mathys Tel chu Rennes aṭangin an lalut a, a man zat tarlan ni lo mah se Bundesliga club hian euro maktaduai 28.5 an insenga ngaih a ni.

French rawlthar beiseiawm Tel hian kum nga chhung khel turin contract a ziak a, a kum a la nau deuh avangin Bayern-a hmun pawimawh chang nghal tura beisei chi a ni lo.

Season hman zawh taka Rennes tana match 10 kheltu forward hi France Under 17 & U18 tan a inlan tawh a, June thlaa UEFA European Under-17 Championship nomawi France-in an chawi khan captain a ni.

Bayern sporting director Hasan Salihamidzic chuan, "Europe-a talent nei ṭha ber pawl a ni a, amah lakluh duhtu an tam hle," a ti a, Tel an chang thei chu a lawm thu a sawi.

German club manager Julian Nagelsmann chuan, "Engtikah emaw chuan season khatah goal 40 a la khung thei ang tih ka ring a, mahse, tun atan chuan season khata goal 10 a khung pawhin kan lawm tawk ang," a ti.

Bayern hian an striker chhuanvawr Robert Lewan-dowski chu Barcelona lakah an chân tawh a, chutihrual chuan player langsar zingah Liverpool forward Sadio Mane leh Dutch defender Matthijs de Ligt te an lalut tawh.

Anni pahnih bakah hian Ajax aṭangin Netherlands midfielder Ryan Gravenberch leh Ajax aṭang thoin, Morocco international Noussair Mazraoui an lalut tawh bawk.