A naute khelh danah Allegri a lungawi

Barcelona leh Juven-tus ten nimin zing khan friendly match an khel a, 2-2 in an inhnehtawk. Old Lady manager Massimiliano Allegri chuan season thar inbuatsaih nana a naute khelh danah a lungawi thu a sawi.

Cotton Bowl, Dallas-a inkhelah Barcelona tana contract ziak thar Ousmane Dembele-a'n goal hnih khungin, Italian team tan pawh Moise Kean chuan goal hnih a khung ve bawk, team pahnih hian an player enchhin kual nan an hmang.

Juve manager Allegri chuan, "Hna kan thawk ṭha viauah ka ngai, kan inbuatsaihna leh kan khelh chhuah dan kha a lawmawm. Ball hloh nasat loh kan zir a la ngai, chumi bakah chuan goal hmaah kan hriam zual a ngai bawk," tiin a sawi.

Turin club hian hliam vangin Paul Pogba an chhawr thei lo, an player pawimawh ṭhenkhat chu hliam vangin an chhawr thei lo bawk. Season hnih chhung Serie A nomawi an chawi phak lo a ni a, kuminah a tir aṭangin thapui an thawh ang.

Season thar inbuat-saih nan Juventus hian Spanish club ṭha pahnih - Real Madrid leh Atletico Madrid te an la hmachhawn dawn. Serie A an match hmasa atan August 16 hian Sassuolo an mikhual dawn a ni.

Barcelona manager Xavi pawhin a player neih thar enchhin nan a hmang. Striker Robert Lewandowski sirah Dembele leh Pierre-Emerick Aubameyang te an awm, season tharah pawh anni pathum hi an pawimawhin a rinawm.

Chutihrualin Lionel Messi-a jersey number 10 an hlan chhawn tak Ansu Fati an la nei. Spain international Fati a hliam a nih loh chuan rinrawl zingah a tel dawn, chuvangin tlarhma chu an la insiamrem leh ang - tuna a lan dan chuan Auba tan inkhel bul ṭantu nih reng a harsa mai thei.

Leeds United aṭanga an lak Raphinha pawh second half-ah a inlan. Real Madrid laka goal mawi khungtu hian hun remchang a nei leh a, mahse a goal shot ṭhat zet chu goal bar chungah a liam, a vannei nawn thei ta bik lo.

Chelsea aṭanga an lak Andreas Christensen pawh bul ṭantu zingah a tel. Denmark interna-tional hian tihsual lian tham a nei lo, chutihrualin anmahni lamah goal hnih a luh avangin tlarhnung a la phui tawk lo tihna a ni, hmasawnna tur an la nei.

Goal hnih khungtu Dembele chungchang sawiin Xavi chuan, "Player danglam, thiam leh ṭha bik a ni, ani ang hi chu an tam lo. A theihna ang taka khel chhuak tur hian puih a mamawh chang a awm, chumi tur chuan keini a kiangah kan ding reng ang.

"Inkhelah hian player zawng zawng tan danglamna siam theih a ni lo, ani hi chuan a thei a ni," a ti. Hliamin a tihbuai nasat em avangin Dembele hian Barcelona tan beisei a phak lo, legend Xavi lo kir hnuah erawh hun rei lote chhungin a danglam leh thei.

Barca hian July 31, Pathianni zingah New York Red Bull an tum leh dawn a, season thar bul ṭan hmain Pumas UNAM nen an la inkhel leh bawk ang.