Ni 8 chiah a awm tawh
Premier League ṭan nan ni riat chiah a awm tawh. Kumin November 21 - December 18 chhung hian Qatar-ah FIFA World Cup khelh a ni dawn a, hemi a nih avang hian Premier League pawh ṭan hma hret a ni.
Arsenal-in August 5, Zirtawpni zan hian Selhurst Park Stadium-ah Crystal Palace an lenchilh dawn a, inkhel hmasa ber tur a ni ang. Gunners hian Manchester City aṭangin Gabriel Jesus leh Oleksandr Zinchenko an lakluh bakah Porto aṭanga Fabio Vieira te lakluh avangin an khel hi en a châkawm tawh hle.
Champion rinkai ni pha Liverpool-in Sadio Mane an hralh a, Uruguayan forward Darwin Nunez an lalut thung. Jurgen Klopp-a hote hian August 6, Inrinni tlai dar 5:00-ah Fulham an tlawh dawn.
Tottenham Hotspur-in Antonio Conte hnuaiah season bul an ṭan dawn an ni ringawt lo. Spurs hian Ivan Perisic, Yves Bissouma, Richarlison leh Clement Lenglet te an lalut. London club hian Southampton hmaah fiahna an hmachhawn ang.
Chelsea-in club neitu thar an nei a, Russian pa hausa Roman Abramovich hnuaia an hlawhtlinna kha American pa hausa Todd Boehly lakah an chhunzawm thei ang em, tih chu zawhna a tling. Blues hian friendly match hnuhnung berah Arsenal 4-0 in an hneh lo a, Premier League ṭan hunah erawh an insiamṭhat hman besei a ni. Thomas Tuchel-a hote hian player langsar Raheem Sterling leh Kalidou Koulibaly an lalut a, match hmasa bera an hmachhawn tur chu Everton a ni dawn a, Goodison Park-ah an khelh dawn avangin a awlsam lo ang.
August 7, Pathianni zanah Manchester khaw club pahnih Man City leh Man United te an inlan dawn. Champion lai Pep Guardiola hoten London club lakah an player ṭha an hralh a, amaherawhchu Man City hian Erling Haaland leh Kalvin Phillips te an lalut. City hian match hmasa berah West Ham United an hmachhawn ang.
Man United-in transfer laiin Tyrell Malacia, Christian Eriksen leh Lisandro Martinez te an lalut tawh a, mah se Erik Ten Hag-a hote hian nipui bazar an hmang ṭha tawk lo. An player lakluh duh ber Frenkie de Jong pawh an lalut thei lo. Amaherawhchu Dutch manager hnuaiah Ten Hag-a hoten friendly match-ah game mawi an khel a, Old Trafford-a Brighton & Hove Albion nena an inkhel hi inkhel en châkawm zinga mi a ni.
August 5, Zirtawpni zan
Crystal Palace 12:30 AM Arsenal
August 6, Inrinni
Fulham 5:00 PM Liverpool
AFC Bournemouth 7:30 PM Aston Villa
Leeds United 7:30 PM Wolverhampton Wanderers
Newcastle United 7:30 PM Nottingham Forest
Tottenham Hotspur 7:30 PM Southampton
Everton 10:00 PM Chelsea
August 7, Pathianni
Leicester City 6:30 PM Brentford
Manchester United 6:30 PM Brighton & Hove Albion
West Ham United 9:00 PM Manchester City