Hualnghohmun leh Chanmari ten Republic Veng - Thlang an pet chhuak

Central YMA Inter Branch Foot­ball Tournament-ah Hualngo­hmunin Aizawl khaw pawn beiseina chhi êng chhunzawm turin Republic Veng 3-2 in an hneh a, Chanmari vengin coach Chawngthansanga hoin Republic Vengthlang 3-0 in an sawp. TṬ Royte Trophy-ah Republic Derby hmuh tur a awm dawn lo.

Nimin khan CYMA Football Last 16 khelh zawh a ni a, Mizoram chhunga veng/khua inkhelh thiam pariat chu ITI Veng, Ramhlun South, Chhinga Veng, Salem Veng, College Veng, Chaltlang, Hualngohmun leh Chanmari te an ni.

Goal nga luhna!
Republic Vengin minute 8-na lekah F. Lalrinpuia leh Lalruatfela te hmangin Hualngohmun tlarhnung mawi zetin an ṭhiat nghal a, rawlthar duhawm Lalmalsawmtluanga'n a hmawr a bawk nalh hle.

Goal khat vangin Hualngohmun an buai phah lo a, midfield-ah Lal­ram­tharmawia a ṭangkai a, mual vei lam aṭangin Vanlalthanga'n Republic Veng tlarhnung a rum ṭhaih reng bawk. Republic Vengin an insiam ṭhat lawk loh an tuar a, Thanga cross ball ṭha zet chu minute 24-naah Lalnunhlua'n a tauh lut.

Referee-in Republic Veng goal hmahruai khungtu MST-a pe­nal­ty beiseina a ṭawmpui lo a, Hual­ngohmun lam tan Mamawitea leh Thanga ten goal ban an pet per ve bawk. First half-ah goal dang a luh belh lo.

Second half-ah Thanga'n Repub­lic Veng tlarhnung tihsual hmang ṭangkaiin vei lam aṭanga a ball vawrh luh chu goal-ah mawi zetin a lut a, Hualngohmunin minute 46-naah hma an hruai nghal. Republic Veng lamin an nawr let a, Valpuia ball pet kawh tak chu keeper-in man nghet zo loin MST-a'n hnai tak aṭangin a hlah. Amaherawhcu Khelo India-a Mizoram champion puitu MST-a hian a chance vawi hnihna erawh minute 66-naah a tauh goal chiang hle.

Inkhel boruak a nung chho a, Republic Veng defender Rorelliana inhliam vangin box chhungah a tlu a, referee-in inkhel a tih tawp loh bakah team pahnihin ball an petchhuah loh avangin Hualngohmunin an goal thumna Lalneihkima hmangin minute 79-naah an khung.

Republic Vengin sihphurh sut tumin an nawr let a, hun tawp lamah penalty shout vawi hnih nei mah se huaisen takin a hmuh danah referee a ding tlang. Hualngohmun defender Lalhmunmawia a khel ṭha a, Khatla an hneh ṭum ang thoin an khingpui aiin chak châkna an ngah zawk a, an huaisen rah sengin quarterfinal an lut.

Hualngohmun khawtlang ṭan­rualna a lang nawn leh a, kawr eng ha chungin khuang nen an au rual a, an ṭanrual rah an seng.

Hei le, Chanmari
Coach tawnhriat nei ṭha Chawng­thansanga'n a enkawlna hnuaia Chan­mari ṭhat ber ṭum a nih thu Vanglaini a hrilh a, khelmualah pawh an ṭha tih lantirih Lalsangzuala Hmar enkawl Republic Vengthlang 3-0 in an hneh.

Republic Vengthlangin inkhel bul an ṭan ṭha a, team ṭha pahnih in­­­khel a hmuhnawm nghal hle. Amah­­­erawhchu Chanmari FC-in Jerry Mawihmingthanga an nei a, CFC aṭanga a inzirchhuah hnua DSK Shivajians-a intat hriam Chanmari tlangval hi team pahnih danglamna a ni.

Minute 25-naah Jerry-a ball pet chu Republic Vengthlang defender-in dang per hman mah se a per chu Rosangliana tan duhthusam a ni a, Luangmual FC striker hluiin awlsam takin a khung. Chanmari an chungnung bik lo a, amaherawhchu Jerry an nei tlat.

DSK Shivajians player hian box pawnah goal khung tura insiamremna hun ṭha pek a nih avangin yard 25 aṭangin mawi zetin a khung a, Jerry bawk hian freekick vawrhluh aṭanga tauh chhuah chu box pawn aṭang thoin goal kilah tak a khung leh bawk. Republic Vengthlangin Mizoram keeper Lal­muanawma an nei a, hei hian Jerry goal class san zia a pholang.

Second half-ah Republic Veng­thlang­in chak tumin an chhuanvawr Lalruatfela Zote an luhtir nghal a, an phur phah sawt. Amaherawhchu Chan­­mari tlarhnung hi tawnhriat nei ṭha Mizoram captain Lalrinchhana hoa inrem a nih avangin an talbuai duh lo a, RVT lamin goal an khung lawk loh bakah Chanmari lamin goal thum an neih tawh avangin inkhel a nung tawk lo.

Hun tawp lamah Fela Zote chu penalty area-ah tihtluk a ni a, referee thutluknaah Republic Vengthlang an lawm lo. Chanmariin goal an chhuah lo a, goal thuma chak chungin quarterfinal an lut.

Nimin Inkhel Results
Republic Veng 2 - 3 Hualnoghmun
REP : Lalmalsawmtluanga 8', 66'
HUA : Lalnunhlua 24'; Vanlalthanga 46'; Lalneihkima 79'
Chanmari 3 - 0 Republic Vengthlang
CHA : Rosangliana 25'; Jerry Mawihmingthanga 39', 41'
Quarterfinal
June 12, Thawhṭanni
11:00 AM ITI Veng Vs Ramhlun South
01:30 PM Chhinga Veng Vs Salem Veng
June 13, Thawhlehni
11:00 AM College Veng Vs Chaltlang
01:30 PM Hualngohmun Vs Chanmari