Conte-a'n chhuak turin min duh - Costa

Chelsea striker Diego Costa chuan manager Antonio Conte-a'n Stamford Bridge-ah mamawh a nih tawh loh thu a hrilh niin a sawi. Kum 28-a upa striker hian season hman zawh takah khan Premier League match 35 khelin goal 20 a khung a, player pawimawh a ni.

Costa chuan, "Chelsea player ka ni a, mah se an hnena cham zel turin min duh tawh lo. Antonio Conte hian message hmangin min mamawh tawh loh thu min hrilh a, season thara a ruahmannaah ka tel ve tawh lo," a ti.

Kum 2014-a Atletico Madrid aṭanga pound maktaduai 32-a Chelsea pantu striker chuan, "Tun season bikah hian coach-te nena kan thawhhona a ṭha lo takzet a, a pawi hle a ni. Chelsea hnenah ka dinhmun chiang takin ka sawi tawh a, club dang zawm tur ka zawn a ngai dawn a ni," tiin London club a chhuahsan tur thu a tichiang.

Brazil-a piang, Spain interna­tional striker hian Atletico Ma­drid-a kir leh chungchang a lo sawi tawh ṭhin a, mah se tun trans­fer bazar-ah player lalut thei lo tura Spanish club hi hrem an nih avangin Costa dinhmun a chiang lo.

January transfer laia Chinese club-ten kum khata pound makta­duai 30 hlawh tura an lo sawm tawh striker chuan, "Atleti ka pan chuan January hma ka inkhel thei dawn lo tihna a ni a, ngaihtuahna sen thiam a harsa hle. Mahse, Atletico hi ka hmangaih a, Madrid khawpuia chen nuam ka tihzia chu mi zawng zawngin an hria a ni,"

"Atleti lama kir leh hi thil nuam tak a ni ang. Mahse nak­kumah World Cup chauh lo pawh thil thlir tur tam tak a awm a, thla nga tawp inkhelh loh chu ka hrethiam lo. Kei chuan inkhelh hi ka duh ber a ni," a ti a, Atletico lamah a kir hmel loh.