AIFF-in thutlûkna siam thei lo
India rama football thuneitu sang ber AIFF-in season thara league kal dan tur chungchangah thutlukna a la siam thei lo.
June 7 khan Kuala Lampur-ah Asian Foot-ball Confederation huai-hawtin AIFF hotute, I League club hotute leh ISL club hotuten India ram football kal dan tur chungchang an sawi ho a, Mizo club AFC president Robert Romawia Royte pawh telin I League leh ISL kal dan turah thutlukna mumal an nei lo.
Nimin khan Mumbai-ah AIFF Executive Committee meeting neih a ni a, I League leh ISL kal zel dan tur bawk sawi khawm niin thutlukna siam theih a ni chuang lo. India ram football kal zel dan turah AIFF hotutute ngaihdan a inang lo a, meeting boruak pawh a ṭang ṭha hle.
AIFF President Praful Patel chuan June 10 khian I League leh ISL club hotute a kawm ang a, he hunah hian season thara India ram football kal dan tur mumal zawk an sawichhuah theih beisei a ni.
Nimina AIFF Execu-tive Committee Meet-ing-ah hian Mizoram aṭangin Lalnghinglova Hmar, AIFF executive committee member pawh a tel a; meeting pangngai neiha thutlukna siam a nih tak loh avang hian meeting zawh hnuah ISL leh I League kal zel dan ngaihtuah hian AIFF president ho hian IMG Reliance aiawhte bakah League committee chairman Subroto Dutta, vice chairman Lalnghinglova Hmar, AIFF general secretary Kushal Das leh AIFF vice president Larsing Ming te ṭhu fualin an thlirho leh a, thutlukna siam a la awm lo.
Tuna a lan dan chuan ISL leh I League hi a ruala kalpui tumna a awm a, a ruala a kal chuan I League hian player ṭha an chan deuh vek dawn niin a lang a, player langsar chin chuan pawisa tamna zawk ISL an pana rin a ni.