Cleveland ngam loh Kevin Durant

Golden State Warriors tan NBA champion ni turin match khat bak chak a ngai tawh lo. Warriors hian nimin zing khan Cleveland Cavaliers 118-113 in an hneh a, series-ah 3-0 in hma an hruai - Inrinni zing dar 6:30-ah Game 4 khelh a ni ang.

Hei le Durant

Quicken Loans Arena-a inkhelah hun tawp hma minute thum a la awm thlengin mualneitu Cavs lamin point rukin hma an hruai avngin chak tura ngaih an ni. Mahse, a tawpa an ngam loh chu Kevin Durant a ni.

Game hmasa pahnihah an chak loh tawh avangin Cleveland-in chak ngei an tum, an dinhmun pawh a ṭha hman. Amaherawhchu, second 45 chiah a awm tawh tihah Durant chuan three point vawm lutin a team chu 114-113 in hma a hruai pui a, point thum an neih belh zui bawk avangin hnehna an chang. Game 3 inkhela point hnuhnung 11 chu Warriors lam chan vek a ni!

Kum 28-a upa Durant hian court chhungah minute 40 hun a hman chhungin point 31 a score, heng zinga point sarih zet hi hun tawp hma lawka a score a ni - rebound vawi li a la bawk. Golden State tan hian Klay Thompson chuan point 30 a neih bakah point 26 score tu Stephen Curry te chu player langsar an ni.

Forward Durant chuan, "Hun a tlem tawh tih ka hria a, ka ke kha three point luh theihna pawnah chiah a awm tih ka hre bawk. Three points shoot kha tisual palh ni ila chak lo thei kan ni, thutlukna dik ka siam bakah ka vanneih avangin ka lut," tiin a sawi.

Nomawi a hnai

NBA playoff-ah hian 3-0 a hnufual hnua tho chhuak leh thei team an la awm ngai lo. Warriors tan hmabak a hautak tawh loa ngaih a ni. NBA Finals-ah hian team pariat chiahin an khingpui 4-0 in an la hneh thei, hetiang ti thei hnuhnung ber chu San Antonio Spurs niin 2006-07 season khan Cleveland an hneh.

Season hmasa khan Golden State hian regular season-ah match 73 zet hnehna changin Michael Jordan-a khelhna Chicago Bulls record siam an khum tawh. Tun season playoff-ah pawh record thar siam turin match 15 zet an chak zawn ta.

James a beidawng?

Cleveland thiampuipa LeBron James chuan, "Kan khel ṭha, hnehna chang tur pawhin kan thawkrimin kan ti ṭha ve tawk. Mahse, keini aiin an tih ṭhat bleh zel a ni," tiin an hneh loh team a dahsang hle.

NBA Most Valuable Player vawi li ni tawh James hian point 39 zet a score bakah Kyrie Irving chuan point 38 a nei bawk. James leh Irving bakah JR Simth-a'n point 16 a nei a, anni pathum bak hi Cavs player zing­ah point 10 nei tling an awm lo.

American star James kaihhruai­nain season hmasa khan Cavs hian 3-1 a an hnufual hnuah an lehthal leh thei a, NBA record an siam. Kuminah hian an nomawi humhim an tum a nih chuan an inkhelh hmabak pali la awmah chak vek a ngai tawh.