Olympic buaipuitu lam an fimkhur

July 24 aṭanga August 9 chhung hian Tokyo Olympic neih tur a ni a, infiamna khawmpui lian buatsaihtu lam chu tunlaia hrileng mek 'coronavirus' vangin an fimkhur hle - inelna erawh a pangngaia neih theih an beisei.

BBC Sports-in a tarlan dan chuan China rama hrileng hi khawvel pumah mi 24,300 chuangin an vei tawh a, mi 490 chuan an thih pui tawh; ram hrang hrang zingah Japan hi hrivei an awmna zinga mi a ni bawk.

Tokyo Organising Committee chief executive Toshiro Muto chuan, "A rang thei ang bera umbo a nih kan beisei, he hrileng hian Olympic kan neih tur a nghawng buai ang tih hi kan hlau takzet a ni," tiin a sawi.

Olympic infiammite awmkhawm nan Village an siamsak ṭhin, chuta an hotu Saburo Kawabuchi chuan, "Infiammi 11,000 chuang an rawn kal tura ngaih a ni a, kan infiammite an him theih nan kan theihna sang berin hma kan la ang," a ti.

Coronavirus vang hian Olympic qualifier ṭhenkhat chu a khaihlak tawh a, ram hrang hranga infiamna lama thuneitu chuan International Olympic Committee (IOC) leh Tokyo 2020 organiser lam thu an ngaichang reng a ni.