Khawvel infiammi zingah Ronaldo a hausa ber

Sumdawnna lam chanchin ziak ṭhin chanchinbu lar Forbes chuan khawvel huap infiammi zingah thla 12 liam taa sum lalut hnem top 100 a pholang leh ta a, Real Madrid forward Cristiano Ronaldo aia sum lalut hnem an awm lo.

Champions League-a Real Madrid champion puitu Ronaldo hian nikum khan infiammi zinga sum lalut hnem ber dinhmun chu a vawi khat nan a lo luah tawh a, he din­hmuna a vawi khat dinna a ni.

Portuguese forward hian June 1, 2016 leh June 1, 2017 inkarah pound maktaduai 71.8 a lalut.

Khelmuala Ronaldo inel­pui Lionel Messi chuan sum lakluh lamah Portugal cap­tain hi a la phak lo hle. Pathum­na dinhmunah awmin pound maktaduai 61.8 a lalut a, pa­hnihna basketball player ropui LeBron James chuan pound maktaduai 66.6 a lalut thung.

Basketball a chungnung

Khawvel infiammi sum lalut hnem top 100-ah basketball lam chhuak an tam ber a, NBA players 32 ngawt an hming a lang phak! Sum lalut hnem top 10-ah pawh basketball player pali ngawt an lang - LeBron bakah Kevin Durant, Stephen Curry leh James Harden-te chu top 10 huang chhungah hian an tel.

Basketball dawta top 100-a player thawh hnem chu baseball an ni a, American ho infiamna ngainat hian player 22 thawhin an zingah top 10-a lang phak an awm lo thung. American football-in player 15 ngawt an thawh a, pound maktaduai 38.6 laluttu Andrew Luck chu top 10-ah a lang phak. Football-in top 100-ah player pakua an thawh a, infiammi thawh hnem palina an ni.

A kumin chuai lam pan tawh mah se Roger Federer-a sum lakluhin chuai lam a pan ve thei lo, pound maktaduai 49.4 lalutin palina a ni. Gol­fer Rory McIlroy chuan pound maktaduai 38.6 lalutin pasarih­na a ni a, Formula 1 aṭangin pound maktaduai 35.5 laluttu Lewis Hamilton chu sawmna a ni ve bawk.

Khawi aṭangin nge sum?

Player-te sum lakluh hi an hlawh piah lamah sponsors an hmuhna te chhut tel vek a ni. Ronaldo-a'n a hlawh pangngai aṭanga sum a hmuh piah lamah Nike, Tag Heuer, Herbalife, PokerStars, Nubia, XTrade, Sacoor Brother, Pestana hotels leh ama puala a sumdawnna CR7 aṭangin sum tam tak a hmuh belh.

Tennis aṭanga palina din­hmun luahtu Roger Federer-a'n tennis aṭangin pound maktaduai li chiah lalut mah se thil dang ṭanga a sum lakluh zat hi pound maktaduai 44 bawr vel a ni a, hei hian a vawrh san phah hle.

Infiammite sum lakluhna kawngah Nike an thawhhlawk hle. American company lian hian top 100-a player 48 ngawt hi contract an neihpui lai an ni. Top 100 player-ten an infiamna aṭanga an hlawh pangngai baka sum an lakluh hi a tam tham hle a, top 100 ho sum lakluh belhkhawm aṭanga chhutin 29% zet hi sponsors leh thil dang dang aṭanga infiammiten sum an hmuh a ni.

Kohli a lang

Cricket-in khawvela infiam­mi sum lalut hnem top 100-ah player pakhat chiah an thawh a, a hming chu Virat Kohli a ni. Indian batsman hian 89-na dinhmun a luah a, pound maktaduai 16.96 a lalut. Heti zat sum lalut tur hian a hlawh aṭangin pound maktaduai 2.31 a lalut a, thil dang aṭanga a sum lakluh hi pound maktaduai 14.65 a ni.

Forbes-in 2012 aṭanga in­fiammi sum lalut hnem a pholan top 100-ah hmeichhe player pahnih tal lang ziah mah se kuminah erawh Serena Williams chiah a lang phak a, American tennis player hian 51-na dinhmun luahin pound maktaduai 20.82 a lalut. Hmeichhe player top 100-a hmuh tur awm reng ṭhin Maria Sharapova chu thla 15 zet hrem a nih avanga contract a hloh nual avangin kuminah hian a lang phak lo.

Top 100-ah hian ram hrang hrang 21 aṭangin player hming a lang a, American player lang hnem berin infiamna huang hrang hrang aṭangin players 63 ngawt an thawh! Hei hi a chhan ber nia lang chu tun hnaiah NBA, NFL (National Football League) leh MLB (Major Lea­gue Baseball) player-te hlawh nasa taka tihpun a nih vang a ni.