Liverpool transfer bazar a fuh thei lo

Champions League khel tura inbuatsaih mek Liverpool transfer bazar a fuh hletithei lo a, Southampton defender Virgil van Dijk lakluh ngei tuma an hel hnuah an player dawr dana lungawi loh avangin Saints hi Premier League thuneitute hnenah zualko an tum a, Liverpool an inhnukdawk nghal.

Manchester City leh Chelsea pawhin lakluh an duh defender hian Anfield pan a duh thu tichiang tawh mah se Saints-in an lungawi lohna Premier League hotute hnena thlen an tum avangin Liverpool hian ngaihdam an dil a, Van Dijk lakluh an tumna chu an chawlhsan thu an sawi nghal bawk.

"Liverpool Football Club chuan Southampton nen kan inkara player transfer chungchanga thuthang awm hi pawi kan ti a, hriatthiam loh palh thil a awm a nih chuan Southampton neitu, board of directors leh fan-te chungah ngaihdam kan dil a ni. Southampton dinhmun hi kan hrethiam a, Van Dijk lakluh kan tumna chu kan bansan tih kan puang nghal bawk a ni," an ti.

Van Dijk lakah chauh a ni lo, Liverpool hian AS Roma winger Mohamed Salah lakluh an tumna chu bansanin Sporting Lisbon winger Gelson Martins lam an hawi bawk. Reds hian Salah lakluh tumin Roma hi pound maktaduai 28-in dawr mah se an dawrna hmasa hi hnawl a ni a, Italian club hian pound maktaduai 40 chuang an beisei avangin Reds-in heti zata lakluh tumna an nei lo.

Kum 22-a upa Martins a contract-ah hian 'pound maktaduai 50-a lei duh an awm a nih chuan a chhuak thei ang' tih a awm tel a, Reds hian Portugal international hi lakluh an tum a nih pawhin insen nual chu an ngai dawn tho tihna a ni.

Sporting academy chhuak Martins hian season hmasa khan Por­tuguese league-ah match 32 a inlan a, goal ruk khungin a ṭhiante khung tur vawi 14 a siamsak.