Murray hmachhawn tur Wawrinka

French Open hmawr bawk a hnai, vawiin tlai dar 2:30 hian mipa singles semifinal khelh ṭan tur a ni. World number 1 Andy Murray leh Stan Wawrinka an inkhel dawn a; clay court-a player ṭha bik Rafael Nadal leh Dominic Thiem ten final hmunruak pakhat an inchuh bawk ang.

Philippe Chatrier Court-ah Nilaini zan khan Murray leh Kei Nishikori ten quarterfinal an khel a, seeded pakhatna Murray hian set hmasa ber hloh mah se 2-6, 6-1, 7-6(0), 6-1 a hnehna changin a zawna a vawi li nan semifinal a lut.

Kum 30-a upa Murray chuan, "Stan hian clay-ah a khel ṭha takzet a, nikum pawh khan player tawhkhirh a nih zia ka hre chiang tawh. Tun ṭumah hian final lut tur chuan nidang zawng aia ṭhain ka khelh a ngai dawn a ni," a ti. Season hmasa khan Murray hian final lut mah se Novak Djokovic a hneh lo.

Quarterfinal inkhel pakhat zawkah Wawrinka chuan US Open champion hlui Marin Cilic 6-3, 6-3, 6-1 in a hneh ve bawk. Nikum khan Stan leh Murray te hi semifinal-ah bawk an inhmachhawn, he mi ṭum hian Murray-a'n hnehna a chang.

Swiss star Wawrinka hi kum 32 mi a ni a, kum 1985 hnulama Roland Garros-a semifinal lut thei upa ber a ni. Kuminah a khel ṭha tluang hle, match nga a khelh tawhah set a la hloh miah lo a, kum 2015-a a hlawhtlinna hmunah hian nomawi chawi a inbeisei sang khawp ang.

Grand Slam vawi thum cham­pion tawh Wawrinka chuan, "Nikum khan Ady lakah ka chak lo, kuminah erawh kan intawn hmasak ai kha chuan inrintawkna a neih tlem ka ring a, ka tan kawng a inhawn ngei ka beisei. Ka thawkrim a, ka tana ṭha turah huai taka ka kal ngam vanga hetiang dinhmun thleng thei hi ka ni, tawp mai ka tum lo," tiin final luh a tum ruh hle.

Nadal vs Thiem

World number 2 Djokovic-a'n nikum khan French Open nomawi a chawi a, a kalkawngah Thiem a hneh. Serbian tlangval hi kum 1969 hnua Grand Slam nomawi pali kawl khawm thei leh hmasa ber a ni hial!

Mahse, Roland Garros hnu­lamah Djokovic hian beisei a phak tawh lo. Tun season-ah kum 23-a upa Thiem a ngam loh avangin a zinkawng a tawp. Seeded parukna Thiem hi tunlai player chhuak thar zinga hmuhnawm leh thahrui nei ṭha bera ngaih a ni.

Austrian tlangval Thiem chuan semifinal thlirin, "Rafael Nadal nen kan inkhel dawn. Roland Garros-ah chuan ani hi player hlauhawm ber a ni a, tournament dang zawng aia a khelh ṭhat tluan lai a nih bawk avangin inkhel hautak ber ka hmachhawn dawn a ni," a ti. Champion lai Djokovic sawptu hi Nadal tan pawh awlsam taka nuai liam mai chi a ni dawn lo.

Thiem hian semifinal lut turin set a la hloh lo a, a khingpui tur Nadal pawhin straight set-in hnehna a la chang fai vek. Spain tlangval hi a khingpui Pablo Carreno Busta chu set hnihna an khelh ṭan tirhah a pum nat avangin a inkhel zui thei lo a, inkhel hah lutuk loin quarterfinal a paltlang.

Kum 1968 hnulam, Grand Slam-a professional player te tel ve an phal hnu (Open Era) chinah chuan major tournament pakhata vawi 10 champion thei an la awm ngai lo. Nadal hian he record thar hi siam turin match hnih bak chak a mamawh tawh lo a, a hna pawimawh hmasa chu Italian Open-a a ngam loh Thiem hneh a ni.

Kum 31 mi Nadal chuan, "Thiem hi player khirhkhan tak a ni. Barcelona leh Madrid Open final-ah ka hneh a, mahse Rome-ah ka chak lo thung. Tun ṭumah hian ka chak ngei ka beisei," tiin a sawi.