Juve-ah Massimiliano Allegri a nghet

Massimiliano Allegri chuan Ju­ven­tus manager nih chhunzawm zel turin contract thar a ziak. Italian manager hian kum 2020 thleng Turin club hi a enkawl ang.

Kum 49 mi Allegri hian Antonio Conte thlakin kum 2014 July thla khan Juve hi a enkawl ṭan. A kaih­hruaina hnuaiah Serie A leh Coppa Italia nomawi vawi thum an chawi a, Champions League final vawi hnih an lut bawk.

Juventus chuan thuchhuah siamin, "Juventus leh Allegri hian zawi zawiin hma an sawn zel a, sulhnu leh player ropui a siam chhuak mek a ni. Chanchin duhawm neih belh turin kan thawkho zel ang," an ti.

Nikum May thla khan Allegri hian kum 2018 May thla thleng daih contract a ziak tawh bawk a, a hnathawh ṭhat avangin Turin club hian hun rei zawk cham chhunzawm turin an duh a ni.