World Cup-a Netherlands hruai tum Advocaat

Zanin dar 12:15-ah Nether­lands-in World Cup qualifier khel turin Luxembourg an mikhual dawn a, FIFA World Cup 2018 khel lo thei dinhmuna ding mek Holland hi boss thar Dick Advocaat kaihhruaina hnuaiah an khel ang.

Netherlands manager chuan, "Hna ropui tak, chona phur­awm tak a ni. A harsa dawn tih ka hria a, mahse a tih theih tih erawh ka chiang a ni," tiin Group A palina Netherlands tan World Cup 2018 khel tura kawng a la awm thu a sawi.

Netherlands dinhmun

FIFA World Cup 2018-ah UEFA-in hmun ruak 13 an nei a, he hmun ruak inchuh tur hian group pakuaah team 54 ṭhen darh niin Group A - I ah dah an ni. Group tina a ti ṭha ber hi World Cup khel turin an tling chiang dawn a, a ti ṭha pariatin hmun ruak dang pali inchuhin playoff an khel leh ang.

Netherlands hi Group A-ah awmin palina an ni mek a, an chungah France, Sweden leh Bulgaria an awm. Advocaat-a naute hian match nga khel tawhin match nga an la hmabak a, pahnihna Sweden an phak lohna hi point li lai a ni tawh.

Chhandamtu Dick?

Manager tawnhriat nei ṭha Dick Advocaat-a'n 2015-ah Premier League tlak hlauh­awma awm Sunderland a chhanhim a, World Cup khel lo thei dinhmuna ding mek Netherlands an chhanhim zo dawn em? tih hi zawhna chu a ni.

Advocaat hi thla hmasa khan Danny Blind thlak tura lakluh a ni a, Blind hi March thlaa Bulgaria 2-0 a an ngam loh hnuah ban a ni. Hemi hnuah hian Netherlands hian Italy chu friendly match khelhpuiin an ngam lo a, Morocco leh Ivory Coast an hneh leh tawh thung - a vawi thum nana an ram manager dinhmun chelhtu Advocaat hnuaia an match hmasa berah hnehna chan an duh ang.

Result a pawimawh

South Korea, Belgium leh Russia pawh lo enkawl tawhtu Advocaat chuan, "Kan tan chuan result hi a pawimawh ber a ni a, game mawi tih vel ka ngaihtuah dawn lo. Kan duh chu point hlawhchhuah a ni," tiin a sawi a, Luxembourg lakah hnehna chan ngei a tum.

Advocaat hi Ruud Gullit chuan a thawhpui dawn a, Netherlands captain hlui hi assistant coach a ni. Hetihrual hian Advocaat chuan Wesley Sneijder-a'n inkhel bul a ṭan tur thu a sawi bawk a, Ga­la­tasaray midfielder hian kum 33-a tlinna champha chu Netherlands tana inlan hnem ber nichungin a lawm dawn tihna a ni - vawi 130 inlan tawhin Edwin van der Sar nen ram tana inlan hnem ber an ni mek.