Ramhlun hnehin Hunthar an tlang

GIG Motors Pro Vol­ley­ball League khelh mek­ah Nilani zan khan Hun­thar Veng chuan Ram­hlun Sporting Club 3-1 in an hneh a, Chhinga Veng hnung zuiin semifinal an lut.

R. Dengṭhuama In­door Stadium, Mualpuia inkhelah Hunthar Veng hian 25-15, 25-22, 19-25, 25-13 in hnehna an chang. Hunthar tan Lalbiakmuana'n point 18 hmuin vawi thum a tisual nei mah se PVL season hnihna kal mekah Mizo mipa player zinga LG D3 Player of the Night trophy dawng thei hmasa ber a ni.

Hunthar Veng hian league round vawi li khelh tur an neih an khel zo tawh a, an match hmasa berah chak lo mah se a hnuhnung pathumah hnehna an chang fai vek.

Match hmasa lamah TNT leh 3rd MAP te chu 3-2 ve vein an hneh zawn a, a vawi khat nan point thum thawk chhuakin point sarih an khawl a, league-a pahnihna ni chungin semifinal an khel dawn a ni.

RSC lakah hian Biak­muana bakah Samson VL Chhanchhuaha, Lal­rin­hlua leh setter Rem­sangzuala te hmun pawi­mawh an luah a, an chakna thahrui an ni.

Ramhlun club hian point thum an neih sa an hmuh belh lo va, Zirtawpni zanah league round khar nan a hnuai bera awm 3rd MAP nen an intum dawn, semifinal lut turin hun ṭha an la nei. Nizan khan TNT leh Chhinga Veng an inkhel a, he thu buatsaih lai hian result kan hre hman lo.