Halep tan Grand Slam nomawi a hnai?

French Open champion ni turin Simona Halep tan match khat bak chak a ngai tawh lo. Zanin dar 6:30 hian Philippe Chatrier Court-ah Roland Garros hmeichhe singles final khelh tur a ni a, seeded pathumna Halep leh tleirawl hmuhnawm Jelena Ostapenko an inhmachhawn ang.

Romanian nula Halep hian Ningani zan khan seeded pa­hnihna Karolina Pliskova chu darkar hnih chhungin 6-4, 3-6, 6-3 in a hneh. Czech nula Plis­kova hian semifinal paltlang chu nise karleha world ranking chhuak tharah number 1 a ni thei dawn a, mahse a beiseina a thlawn ta rih.

Kum 25-a upa Halep hi player beiseiawm berte zinga mi a ni ṭhin. WTA Tour 250, 500 leh 1,000 ah te hlawhtlinna a chang tawh nachungin major tournament-ah a la hlawhtling thei ngai lo.

French Open-ah hian kum 2014 khan final a lut tawh, hemi ṭum hian Maria Sharapova a hneh loh vangin pahnihna a ni. Kuminah a vawi hnih nan final a khel dawn a, beiseina a nei sang hle.

World number 4 Halep chuan, "Final ka khel leh tur hi ka lawm hle, player naupang tak nen kan inhmachhawn dawn avangin chona thar leh hautak a ni ang. Round hmasa lam zawng aia ṭhain ka khelh theih ka beisei," a ti.

Halep hian kumin French Open-ah hian match ruk a khelh tawhah set hnih chiah a la hloh a, player khel ṭha tluang bera ngaih a ni. A champion a nih chuan Angelique Kerber lehpelin world number 1 thar a ni dawn.

World number 3 Pliskova chuan, "A chak lo zawk ka nichungin ka khelh danah ka lawm tho. Simona nena inkhel kan nih avangin inkhel kha a hau tak a ni. Ka hmuh dan chuan final hmuhnawm tak a ni dawn, chutih rualin Ostapenko hian tawnhriat a la neih tlem deuh avangin Halep a champion ka ring," tiin a hneh loh player a dahsang zawk.

Birthday girl
Kum 20 tlin champhaah Osta­­penko chuan Timea Bac­sin­szky 7-6 (7-4), 3-6, 6-3 a hneh­in a vawi khat nan Grand Slam final a lut.

French Open-ah hian seeded chang phak lo chungin Mimi Jausovec chuan kum 1983 khan final a lut tawh, mah se Chris Evert a hneh lo. Jausovec tih lohah chuan Latvian nula Ostapenko hi seeded ni phak lo chunga clay court inelna liana final lut leh thei hmasa ber a ni.

World number 47 Ostapenko hian senior inelna huangah hnuhma ropui la nei lo mah se Wimbledon junior champion a ni tawh. Latvia player zingah major tournament lut thei hmasa ber a ni ta chiah bawk - an ram beiseina a ni mek.

Player beiseiawm Osta­penko hian chanchin chhuan tur a la nei. Caroline Wozniacki-i'n kum 19 mi chauh ni chungin 2009 US Open final a lo khel tawh, hemi hnuah Ostapenko hi Grand Slam hmeichhe singles final lut thei naupang ber a ni bawk.

Ostapenko chuan, "Semi­final a nih tawh avangin a tir­ah kha chuan ka zam deuh. Dawhthei taka awm hun a ni tih ka hre chhuak a, set hnihna aṭang kha chuan nuamti takin ka khel thei tawh a ni," a ti.

Forehand aia backhand nei ṭha zawk hial an sawi Osta­­­pen­ko hian final lut turin world number 1 hlui Caroline Wozniacki, 2011 US Open champion Sam Sto­sur leh Rio Olympic gold medalist Monica Puig a hneh, inrintawknain a khat mek - Halep tan nuamsa taka paltlang ngawt tur chi a ni bik lo tawp ang.