Sampaoli enkawl Argentina chak nghal
World champion vawi hnih ni tawh Argentina chuan nimin tlai khan an manager thar Jorge Sampaoli kaihhruaina hnuaia an match hmasa ber an khel a, an ṭhenawm ram Brazil chu defender Gabriel Mercado-a goal khat hmangin 1-0 in an hneh - ram pahnihte hi vawi 108 an intawnna chiah a ni.
Melbourne Cricket Ground, Australia-a inkhel hi friendly match nimah se South America-a ram lian pahnih inhmachhawn a nih bakah player langsar an tam avangin entu mipui 95,569 zet an pungkhawm.
South America World Cup qualifier-a palina ni mek Argentina hian March thlaa Bolivia 2-0 a an hneh loh hnuah Edgardo Bauza banin Chile leh Sevilla manager hlui Sampaoli an lalut, a match hmasa bera hnehna an chan avangin qualifier khelh hmabak pali an la neihah beiseina an nei sang khawp ang - June 13 hian Singapore nen friendly match an khel leh ang.
Argentina tan hian Barcelona forward Lionel Messi, Juventus hmatawng Paolo Dybala leh Gonzalo Higuain bakah Paris Saint-Germain winger Angel Di Maria leh Manchester City defender Nicolas Otamendi te an inlan a, team thar din tum Sampaoli-a'n a player neih ṭhat hmanthiam nghal a tum tih a chiang.
World champion vawi nga ni tawh Brazil an indah ṭha bik lo - captain Neymar chu chawlh pek a nih avangin Copa America khel tura koh loh Thiago Silva chu captain a ni. Liverpool midfielder Philippe Coutinho, Manchester City player pawimawh pahnih Fernandinho leh Gabriel Jesus te bakah Chelsea star Willian te an inlan bawk.
Tite-a'n an ram team a enkawl hnua a chak lohna hmasa ber a tawng. Brazil hi Russia World Cup khel tura inpet tling thei hmasa ber an ni a, South America ram 10 inel zinga hmahruaitu ni turin match riat an chak zawn thei a ni. World Cup qualifier an khelh leh hmain June 13 hian Australia chu friendly match an khelh pui leh ang.