Bopanna hun a thleng ta

Indian tlangval Rohan Bopanna chuan Grand Slam nomawi a chawi ve ta. Ningani zan French Open mixed doubles final-ah Bopanna leh a ṭanpui Gabriela Dabrowski te chuan Anna-Lena Groenefeld leh Robert Farah te inkawp hnehin title an la.

Philippe Chatrier Court-a inkhelah seeded pasarihna Bopanna te hian match point vawi hnih an inchhanhim hnuah 2-6, 6-2, 12-10 in an chak. Bopanna tan a Grand Slam nomawi hmasa ber a ni a, a ṭanpui Dabrowski hi Canadian nula zinga major title la thei hmasa ber a ni bawk.

Kum 37-a upa Bopanna hian tun hmain US Open doubles final vawi khat a lo khel ve tawh a, a chak lo lamah an ṭang. Roland Garros-a a hlawhtlin takah chuan Leander Paes, Mahesh Bhupathi leh Sania Mirza te hnung zuiin Indian player zinga Grand Slam chawi thei palina a ni.

Bopanna chuan, "Ka nuna ka thil tum lian ber pakhat chu ka hlawhtling ta. Ka tan chuan hun nuam leh hlimawm bik, theihnghilh theih tawh loh tur a ni," tiin a sawi.