Chhinga Veng an chak vek

GIG Motors Pro Volleyball League-ah Chhinga Veng chuan league match vawi li an khelh tawhah hneh loh an tawng lo. Ningani zan khan TNT, Muanna Veng 3-0 a sawpin team ṭha ber an nih zia an lan nawn tir.

R. Dengṭhuama Indoor Stadium, Mualpuia inkhelah Chhinga Veng hian 25-18, 25-19, 25-20 in hnehna an chang, a tir aṭanga a tawp thlengin inkhel an thunun tlan chhuak zak. Chhinga Veng tan hian State pawn player Mandeep Singh chuan point 18 hmuin a vawi thum nan LG D3 Player of the Night atan thlan a ni.

Semifinal lut turin TNT-in chak mamawh mah se kawng engkimah Chhinga Veng an phak lo. Mimal che ṭha ber Laldensanga'n point riat thawk chhuakin point nga a hloh a, hun harsaah team khaiding tur khawpa che ṭha an awm lo.

Chhinga Vengin harsa lo taka set hmasa pahnih an lak zawn hnuin Gurinder Singh an hahchawlhtir a, set hnih a khelh chhungin India captain hlui hian point 11 hmuin point ruk a paih. TNT-in Jatin Singh awltirin Mizo hlangin set thumna an khel bawk.

An dinhmun a ṭhat hnuah Chhinga Veng hian Mandeep la chhuak lehin player langsar lo zawk tan hun ṭha an siamsak. Set thumna tawp lamah Mizo hlang ve vein team pahnih an inbei a, TNT-in point 20 bak an hlawh chhuak zo chuang lo.

Chhinga Veng hian match li a khelhah 3-0 in hnehna an chang vek a, point 12 hmuin table-a palina nen semifinal-ah an intawng ang.

TNT-in league vawi li khel kim ve tawhin point thum an nei a, set nga lain set 11 an hloh. Chhinga Veng laka chiang taka an tlawm rualin Ramhlun Sporting Club-in semifinal an lut a, Muanna Veng team dinhmun erawh a derthawng.

Nizan khan league round inkhel hnuhnung berah Ramhlun Sporting Club leh 3rd MAP te an inkhel a, Police an tlawm a nih chuan TNT an tlang thei ve thung. Chuti ni lova MAP-in RSC an hneh a nih chuan team panga inel zingah semifinal lut pha lovin TNT chiah an tla dawn a ni.

Kumin Pro Volleyball League-ah hian season hmasa lama kan la hmuh loh hmeichhe inena telh niin Power Department SC chuan final an lut tawh.

Zanin dar 8:00 hian hmeichhe league round hnuhnung ber atan Dur­tlang leh Electric Veng an inkhel ang.

Power lakah 2-3 in Electric an tlawm a, point khat an kawl. Durtlangin set khat mah la lovin Power an hneh lo ve thung a, point an la hmu lova, final lut tur chuan zanin hian chak an mamawh.