Vettel hi number 1 a ni lo - Raikkonen

Kimi Raikkonen chuan Ferrari car a khalh pui Sebastian Vettel chu champion tura duhsak bik a nih loh thu a sawi chhuak.

Formula 1 intlansiak hnuhnung ber Monaco Grand Prix-ah Raik­konen hian pole position aṭanga bul ṭanin pakhatna ni thei tura ngaih a ni, mahse a teammate Vettel chu pakhatna niin a hnungah a thleng.

Ferrari team chet dan hi Merce­des driver Lewis Hamilton chuan duhsak bik nei driver tiin a lo sawisel tawh. Britain driver thusawi chhangin Raikkonen chuan, "Lewis hian kan team boruak hi eng tianga thukin nge a hriat ka hrethiam lo," a ti.

Raikkonen chuan sawi chhun­zawmin, "Keini lam chuan hnehna kan chan theih nan kan theihtawp kan chhuah, kan team-ah hian boruak ṭha lo leh induhsak bikna a awm ka hre lo. A ṭha ber nih tumin kan inel mek zawk a ni," tiin a sawi.

Tun season Formula 1 driver championship-ah world champion vawi li ni tawh Vettel hian point 129 hmuin hma a hruai mek a, a hnung chiahah point 104 hmutu Hamilton a awm.

Intlansiak vawi 20 awm tur zinga paruk an tlan tawh a, Pathian­ni zan dar 11:30-ah round sarih nan Canadian Grand Prix an tlan ang.