Gareth Bale tel loin Wales
Pathianni Zan dar 12:15-ah World Cup qualifier khel turin Wales chuan Serbia an lenchilh dawn a, he hunah hian hrem vangin an thiampuipa Gareth Bale a tel thei dawn lo. Khawvela player manto pahnihna Bale tel lo tur hi Wales tan channa niin lang mah se midfielder Joe Allen chuan an buai loh tur thu a sawi.
Stoke City midfielder Allen chuan, "Bale tel loa kan inkhel tur hi keini chuan chona angah kan ngai a, kan ngaihdan chuan hnehna chang tur khawpin kan squad hi kan chhah ṭha tawk a ni. Bale tel lo tur hi a pawi tih phat rual a ni lo a, mahse he team kan ṭhatna em em chu mimal aiin team anga kan thawhhona kan dah pawimawh hi a ni," a ti a, Bale tel loa an chak theih a beisei thu a sawi.
Hetihlai hian West Brom striker Hal Robson-Kanu chu hliam vangin Wales squad aṭang hian a inhnukdawk bawk a, a hmun ruak luah tur hian ram tana la inlan lo Swansea City winger Daniel James chu koh a ni.
Wales hi UEFA World Cup qualifier-ah group D-ah an awm mek a, match nga an khelh tawhah point sarih hmuin a chung bera awm Serbia hi point liin an phak lo mek - hnehna an chang a nih chuan Serbia nena an inthlauhna hi point khat chiahin a zim thei dawn.