World Cup qualifier England leh Germany an inlan dawn
Zanin dar 9:30-ah World Cup qualifier khelh a ni dawn a, Glasgow khawpuiah England chuan Scotland an lenchilh ang. World champion Germany an inlan dawn bawk a, Joachim Low-a naute hian Pathianni zanah San Marino an mikhual ang.
British Derby khel tur England-in Scotland an hmachhawn hmain friendly match khelh an nei lo a, match an neih hnuhnung ber chu March 26 World Cup qualifier-a Lithuania an hneh kha a ni tawh. Germany-in Thawhlehni zan khan friendly match-ah Denmark chu 1-1 in an inhnehtawkpui a, hriatreng tur erawh Denmark laka player inlan hi rawlthar rual an ni a, inrintawkna an hloh phah lo ang.
England dinhmun
FIFA World Cup 2018-ah Europe-in hmun ruak 13 chiah an nei a, UEFA hnuaia ram 54-in he hmunruak hi an inchuh mek. Group A - I a hmahruaitu ṭheuhin Russia an pan thei dawn a, pahnihna zinga a ti ṭha pariatin hmun ruak dang pali inchuhin playoff an khel leh ang.
Group F-ah England-in match nga khel tawhin hma an hruai mek a, vawi li hnehna changin vawi khat an inhnehtawk. Anmahni hnaih bertu Slovakia-in point li laia an la phak loh avangin Gareth Southgate-a naute hi nakkuma Russia pan turin an dinhmun a ṭha hle.
England an ṭang
Three Lions (England sawina)-in World Cup khelh an tum tih khelmual pawn lam thlengin an lantir. Scotland lenchilh tura an inbuatsaihna kawngah manager Southgate chuan a naute hi tawn ngai loh tawntirin Royal Marines ho training-na hmunah darkar 20 zet hun a hmanpui - sipai angin training neihpui an ni.
Southgate hian, "Kan tum ber chu kan naute hian thei tawh lo nia an inhriat piahlam thlenga an beih hram hram a ṭul tih in hrilh hriat hi a ni a, an hmuh phak loh khawvelah hian thil hautak em em a awm tih an hriat a ṭul a ni," tiin a naute chuan sipai training aṭanga game hautak hmachhawn dan an zir a beisei thu a sawi.
England tan Kane
Tottenham Hotspur chhuanvawr Harry Kane-a'n London club tan match 130 a khelh tawhah goal 78 a khung thei a, March 2015 khan ram tana a match hmasa ber khelin goal a khung nghal bawk. Kum 23-a upa striker hian ram tan match 17 a khel tling der tawh a, goal nga a khung tawh. Zanina Scotland an hmachhawn hunah pawh hliam vanga Jamie Vardy a inhnuhdawh avangin goal khung tura beiseina a sang lehzual sawt ang.
Kane chuan, "Club tan season duhawm tak tak ka hmang tawh a, tunah chuan ram tan ka theihna ka pholan ve a hun ta. Ṭum dang zawng aiin ka thawkrim a, ka tum ram hi thlen ngei ka tum a ni. Kum 23 chauha upa ka la ni a, ka tum ram te thleng turin ka inzir belh zel ang a, theihtawp ka chhuah ang," a ti a, a tum ram thleng turin zanin aṭanga bul a ṭan a ṭul dawn.
Khawiah nge Germany?
Kum 2018-ah Germany-in World Cup an khel dawn tiin ziak pawh ni ila, ziah sual chance a tlem tawh hle. World Cup 2014 champion team hi Group C-ah awm mekin hmahruaitu an ni a, vawi nga match an hmachhawn tawhah hnehna an la chang fai vek - vawi nga khelh tawha chak hmel la hmu lo, group mawngphah San Marino lakah point thum hlawh chhuak ngei tura ngaih an ni.
Joachim Low-a'n June 17 aṭanga khelh ṭan tur Confederations Cup 2017-ah naupang rual a hruai dawn a, zanin an inkhelh zawhah an match neih leh hmasak ber tur hi Confederations Cup 2017 group stage-a Australia nen an inkhel tur a ni, San Marino nena an inkhelah Joachim-a'n in enchhin nan naupang rual a chhawr a nih pawhin a mak lo ang.