2017 FIFA Confederations Cup thlirlawk ang
FIFA World Cup tem lawkna atana inelna FIFA Confederations Cup chu June 17, Inrinni hian Russia-ah khelh ṭan a ni dawn. Ram leh ram inelnaah hian khawmualpui champion ṭheuh bakah FIFA World Cup champion Germany leh inelna thlengtu Russia te an tel ang.
Inelna chu
2017 FIFA Confederations Cup hi vawi 10 neihna tur chiah a ni a, kum li dana neih a ni. Inelna hi kum 1992 aṭanga khelh ṭan a ni a, bul ṭantu chu Saudi Arabia niin King Fahd Cup hming pek a ni.
Saudi Arabia hian an ram football team bakah khawmualpui champion te an sawm a, kum 1995 khan a vawi hnih nan an buatsaih leh bawk. FIFA hian kum 1997 aṭangin inelna hi an thuneihna hnuaiah an la lut a, FIFA Confederations Cup tihin a hming pawh a thlak a ni.
FIFA hnuaia khelh a nih hnu hian Confederations Cup hi kum hnih dana khelh a ni leh phawt a, kum 2005 zawh aṭangin kum li danah khelh a ni. King Fahd Cup hming a put laia champion hmasa ber chu Argentina a ni a, Denmark-in nomawi chawi thei pahnihna an ni.
Confederations Cup tih a nih hnuah Brazil an champion hmasa ber a, Selecao hi vawi li champion tawhin an la champion ngun ber a, France-in vawi hnih nomawi an chawi tawh a, Mexico an champion tawh bawk.
Thlanchhuahte
Tun ṭumah hian inelna hnuhnung pathuma champion Brazil an tel pha lo a, champion lai tel loin an khel dawn tihna a ni.
Europe aṭangin ram pathum an tel dawn a, inelna thlengtu Russia, FIFA World Cup champion Germany leh Euro 2016 champion Portugal te an ni. Heng ram pathum bakah hian mahni khawmualpui ṭheuha champion team panga Australia (Asia), Chile (South America), Mexico (North America), New Zealand (Oceania) leh Cameroon (Africa) te an ni.
Player ṭha leh ṭha tur?
Ram hrang hrangin inelna an lak thutak dan chen a inang lo. Portugal-in an ram captain Cristiano Ronaldo chu squad-a an dah a, European champion hian inelna an la thutak tih a chiang nghal.
Portuguese manager Fernando Santos chuan Ronaldo bakah Nani, Joao Moutinho, Pepe te a ko tel. Inelna thlengtu Russia pawhin ram tana vawi 96 inlan tawh Igor Akinfeev leh Chelsea player hlui Yuri Zhirkov te an la chhawr dawn.
Germany erawhin an team
ṭha ber an tir lo a, squad zinga ram tana inlan hnem ber Julian Draxler pawhin vawi 28 chiah a la khel a, ram tana la khel miah lo pawh pasarih lai an awm. Chutihrualin Die Mannschaft player-te hi hmabak nei êng leh club langsara khel an nih hlawm avangin dahhniam theih an ni lo ang.
South American champion Chile hi an player neih ṭhat Alexis Sanchez, Arturo Vidal, Claudio Bravo te hoin an thawk chhuak dawn a. Asia aiawh Australia lamin Everton player hlui kum 37-a upa Tim Cahill chu squad-ah an la ko a, Europe-a khel an awm nual bawk.
New Zealand-in khawvel huapa lar thawhchhuah pui tur an nei lo a, Mexico erawhin Guillermo Ochoa, Rafael Marquez, Jonathan dos Santos, Giovani dos Santos leh Javier Hernandez te bakah player lar an la nei a, Cameroon-in Europe-a khel player an ngah a, dah hniam theih an ni lo ang.
Fixtures
Group A
June 17, Inrinni
Russia 8:30 PM New Zealand
June 18, Pathianni
Portugal 8:30 PM Mexico
June 21, Nilaini
Russia 8:30 PM Portugal
Mexico 11:30 PM New Zealand
June 24, Inrinni
Mexico 8:30 PM Russia
New Zealand 8:30 PM Portugal
Group B
June 18, Pathianni
Cameroon 11:30 PM Chile
June 19, Thawhṭanni
Australia 8:30 PM Germany
June 22, Ningani
Cameroon 8:30 PM Australia
Germany 11:30 PM Chile
June 25, Pathianni
Germany 8:30 PM Cameroon
Chile 8:30 PM Australia