Sri Lanka-in India an barakhaih
India-in Sri Lanka lakah run 321 ngawt vaw chhuak mah se chak nan a tling tawk lo - Ningani tlai khan ICC Champions Trophy-ah Sri Lanka-in champion lai India an barakhaih a, wicket sarihin hnehna an chang - hnehna chang tur hian India target siam zat run 322 an tlin a, ball riat an la hmang bang cheu!
Group B-a team tinin semifinal luhna chance an la nei vek tihna a ni - team paliin match khat ṭheuh an khel tawh a, vawi khat vek an chak. Pathianni tlaiah India leh South Africa an inhmachhawn ang a, Thawhṭanni tlaiah Sri Lanka leh Pakistan an inkhel bawk ang. He inkhela chak zawk ve ve hian semifinal an lut dawn tihna a ni.
India tan Dhawan
The Oval-a inkhelah India an bat hmasa zawk a, opener Rohit Sharma leh a dinpui Shikhar Dhawan-ten India tan bul an ṭan ṭha nghal hle. Over 24.5-ah India-in an wicket hmasa ber an hloh ve chauh a, ball 79 a hmachhawna run 78 vaw chhuaktu Rohit Sharma chu Lasith Malinga chuan a vawm out.
Rohit Sharma thlak tura lo lut Virat Kohli chu run pawh siam loin a out nghal a, Yuvraj Singh chuan run sarih chiah a tlin bawk avangin over 33.3-ah India-in wicket thum an hloh der. Mahse, Pakistan nena an match hmasa bera amah sawiseltute chhanglet tawhtu Dhawan erawh a ding nghet tlat.
Kum 31-a upa batsman hian ball 128 a hmachhawnah run 125 a vaw chhuak a, MS Dhoni chuan a thiam ngai a la thiam reng tih pholangin run 63 ngawt a siam ve bawk. Over 50 a zawh meuh chuan India-in run 321 an siam a, wicket ruk chiah an hloh - chak tura rin loh chi an ni tawh lo.
Team huaisen
Sri Lanka-in India lakah target 322 an nei a, team tam tak tan chak tum ngamna chi pawh niin a lang lo. Mahse, an match hmasa bera South Africa ngam tawh lotu team hian hnehna an chang lo a nih chuan beisei tur an nei tawh dawn lo tih an hria a, huaisen takin India bowling an hmachhawn.
Over 4.4-na lekah Sri Lanka opener Niroshan Dickwella chu run sarih siamin a out nghal a, beisei a bo ṭan. Mahse, The Lions (Sri Lanka sawina) tan Danushka Gunathilaka (76 runs) leh Kusal Mendis (89) te an chet ṭhat chhunzawm a, over nga pawh a tlin hmaa wicket khat latu India-in wicket hnih bak an lak belh tawh lo!
Run 47 siamtu Kusal Perera hliam vanga a inhnuhdawh hnuah pawh Sri Lanka tan captain Angelo Mathews (52) leh Asela Gunaratne (34) te a tawp thleng an dam avangin team huaisen Sri Lanka an chak a, semifinal lut tura inngai tawh India-in match khat an nghah leh a ngaih phah.
Beidawng lo Dhawan
A vawi 10 nana ODI century siamtu Shikhar Dhawan chuan, "Sri Lanka khan an khel ṭha takzet. Target sang tak an nei tih hriain a tir aṭangin min attack nghal a ni. Bowling lamah khan kha aia ṭha zawka ti thei kan ni a, batting lamah pawh ka out hnuin run kha kan siam muang mah mah a ni," a ti.
Mahse, kum 31-a upa batsman chuan an la beidawn loh thu sawi nghalin, "Engtiklai pawha chet ṭhat reng theih a ni bik lo a, tunah hian talbuai tur kan la ni lo. South Africa lakah inkhel pawimawh tak kan nei dawn a, thih leh dam kar a ni tawh. Chuvangin rilru huaisen tak pu chungin kan lo kir leh dawn a, rilru puthmang dik tak nen kan bei ang," tiin a sawi.
Sri Lanka batsman Dinesh Gunathilaka chuan, "India hi team ṭha tak an ni a, anni kan hneh thei hi ka lawm takzet. Inkhelh hma khan thawhrim kan mamawh thu kan sawi a, kan sawi ang ngeiin kan khel chhuak," a ti a, Pakistan lakah hnehna chan ngei an tum thu a sawi bawk.