Ramhlun South leh Chhinga Veng tan fiahna
TṬ Royte Trophy - YMA Inter Branch Football Tournament quarterfinal chu vawiin aṭangin Lammualah khelh ṭan a ni dawn.
Chawhma dar 11:00-ah champion rinkai Ramhlun South-in team tlo ITI Veng an hmachhawn ang a, NECS Cup champion Chhinga Vengin chawhnu dar 1:30-ah dark horse Salem Veng nen semifinal luh an inchuh bawk ang.
Chak tur a hriat?
Quarterfinal hmasa berah hian player neih dan thlirin Ramhlun South hi chak tura rinkai an ni a, Mizoram leh India ram aiawha kal tawh rual enkawltu hi MPL club baka Mizoram team enkawl tawhtu coach hi HC Zarzoliana a ni.
Ramhlun South boss Zara chuan, "Football-ah chuan chiang sa a awm thei lo a, kan beih viau a ngai ang," tiin semifinal thleng tur chuan thawhrim a ṭul thu a sawi. Chanmari West FC coach Zara hian tlarhmaah veteran forward Malsawmfela leh rawlthar duhawm Lalawmpuia te chhawr a tum thu a sawi a, ITI Veng tan tlarhnung rem phui ṭhat a pawimawh dawn a ni.
An khingpui tur ITI Veng manager Lalhriatpuia chuan, "Quarterfinal kan thleng thei hian chona thar min pe a, Ramhlun South hi kan hneh thei tih kan chiang a, tun inelna kan hmachhawn tawha kan khelh ṭhat ber ṭum lantir dawn a ni," tiin upset thlentir a tum thung.
ITI Veng hian Mizoram goalkeeper H. Lalremruata an kawl a, veteran defender Zohmangaiha Ralte ten tlarhnung an la ho a, goal nawr turin Jerry F. Zonunsanga te an neih bawk avangin chak thei an ni. ITI Veng hian tun dinhmun thleng turin Tlungvel Jt YMA, Hlimen, Dinthar leh Zawlnuam Bawrai an hneh Ramhlun South tlukpuia ṭha la hneh lo mah se an khingpui hi team naran chunglam vek an ni.
Tu nge ṭha zawk?
NECS Cup-ah Chhinga Veng an champion a, an khingpui tur Salem Veng aia dahsan zawk an ni. Amaherawhchu an player neih dan leh an khelh dan thlirin vawiin inkhel hnuhnung zawkah hian team ṭha zawk an awm lo.
Chhinga Veng hian Ṭhiak (9-0), Puilo (10-0) leh Ramhlun Vengthar (4-1) te harsatna nei loin hneh mah se match hnuhnung bera Aizawl Venglai an hneh hram. Salem Veng pawhin Durtlang goal khat chauhin an hneh tho a, amaherawhchu hriat tel ṭul erawh player 10-a khel chungin quarterfinal an lut.
Chhinga Veng coach Jonathan Lalbiakkima chuan, "NECS Cup champion kan nih avangin inelna ṭan hma aṭangin beiseina a sang a, pressure sang hnuaiah khel nghal mah ila thawhrimna leh inrintawkna nen pressure nei lo ang maiin kan khel a ni. Player an dam kim a, hnehna kan chan ngei ka beisei," tiin an team a rintawk hle.
Salem Vengin hrem vangin defender Lalawmpuia chhawr thei dawn lo mah se an thiampuipa Joseph Lalnunpuia an chhawr thei tawh dawn a, phurna tham a tling.
Salem Veng coach Jerry Zoremmawia chuan, "Chhinga Veng hi MPL club nei an ni a, NECS Cup champion lai an ni a, tun ṭumah pawh hian club lama an player an awm nual a, vengchhung player hlang hmangin hneh ngei kan inring a ni," tiin semifinal thlen ngei a tum thu a sawi a, inkhel en turin vengchhung mipui a sawm ve nghal bawk.
Quarterfinal
Vawiin inkhel tur
11:00 AM ITI Veng Vs Ramhlun South QF1
01:30 PM Chhinga Veng Vs Salem Veng QF2
June 13, Thawhlehni
11:00 AM College Veng Vs Chaltlang QF3
01:30 PM Hualngohmun Vs Chanmari QF4
Semifinal
1st leg : June 19, Thawhṭanni
11:00 AM Win of QF1 Vs Win of QF2
01:30 PM Win of QF3 Vs Win of QF4
2nd leg : June 21, Nilaini
11:00 AM Win of QF4 Vs Win of QF3
01:30 PM Win of QF2 Vs Win of QF1
Final - June 23, Zirtawpni