Halep hnehtu Ostapenko a champion

World number 47 Jelena Ostapenko chuan number 4 Simona Halep chu 4-6, 6-4, 6-3 a hnehin French Open nomawi a chawi. Seeded pawh chang phak lo chunga pakhatna ni thei Ostapenko hi Latvian tennis player zingah Grand Slam-a hlawhtling thei hmasa ber a ni.

Inrinni zan khan Philippe Chatrier Court-ah final khelh a ni a, seeded pathumna Halep-i'n bul ṭan ṭha zawkin set hmasa ber a lak bakah set hnihnaah pawh 3-0 in hma a hruai - Roma­nian nula Halep hian a vawi khat nan Grand Slam title a la ngei dawn niin a lang hman.

Mahse, kum 20 tling hlim Ostapenko hian set hnihna game hnuhnung pasarih zinga paruk lain set a la let a, set hnuhnung berah pawh a hawikir tawh lo. Major title hmasa ber la tur hian darkar khat leh minute 59 hun a hmang; world number 47 ni chunga Roland Garros kheltu hi tun kara ranking chhuak tharah chuan 12-na a ni tawh ang.

Tennis inelna ngaihhlut bik Grand Slam-ah hian player 32 te chu seeded an ni ṭhin a, he huang chhunga mi ni lo hi an champion khat hle. French Open bikah chuan kum 1933 hnulamah Ostapenko hi seeded chang phak lo champion leh thei hmasa ber a ni!

Lal thar chu...

Riga, Latvia-a piang, feet 5 leh inches 9 a sang Ostapenko hian tun hmain sulhnu lian a la nei ngai lo. Kum 2014 khan Wimbledon junior champion a ni tawh, senior-ah chuan tun ṭum hi a bulṭanna a ngaih a ni.

Grand Slam inelna vawi riat a hma­chhawn­­na chauh a ni a, kuminah hian cham­pion tura rinkai a ni lo chiang hle. French Open khelh hmaa tennis a khelh aṭanga a pawisa lakluh zawng zawng chu pound maktaduai khat (Rs 8,20,97,250) chiah a ni a, tun ṭuma a champion hian Rs 15,13,87,135 a dawng thung.

Rinkai ni lo mah se Ostapen­ko hian clay court-ah attacking game hmuhnawm a chhawp chhuak thei. Final lut tur hian world number 1 hlui Caroline Wozniacki, he hmuna semifnal vawi hnih khelh tawh Timea Bac­sinszky leh finalist hlui Sam Stosur bakah Rio Olympic cham­pion Monica Puig te a paltlang.

Champion tur hian match sarih a khelh aṭangin winners vawi 299 zet a vaw chhuak thei a, final bikah hian ṭum 54 zet winners neiin a ball vuak na tak leh a thahrui ṭha tak chu a chakna hnar a ni, a tum a ruh bawk.

Kawng a awm

Player lar dangte angin Ostapenko hian coaching team a nei ṭha ve lem lo. Amah hringtu a nu Jelena Jakovleva chu a coach a ni a, a pa Jevgenijs Ostapenko chu a tan fitness trainer a ni bawk - Spanish player Anabel Medina Garrigues pawhin a pui bawm ve ṭhin bawk a ni!

Kum nga a nih aṭanga tennis khel ṭantu Ostapenko chuan, "Inkhelh dan min zirtirtu an awm hran lo. Na taka ball vuak duh mi ka ni a, ka rilru a pau­khauh bawk, ka mizia angin court chhungah ka khel chhuak mai ṭhin," tiin a sawi.

A naupan lai aṭanga Serena Williams ngaisang tu Ostapenko chuan sawi chhunzawmin, "French Open ka khelh dawn khan nomawi ka ngaihtuah phak lo, match khat chiah ka ngaihtuah lawk ṭhin. Final-ah pawh khan dik tak chuan set hnuhnung bera 5-3 a nih chiah khan champion chu ka rilruah a awm chauh," a ti.

Latvian player zinga Roland Garros nomawi chawi thei hmasa ber hi an ram president Raimonds Rejoins pawhin semifinal-a hnehna a chan hnu khan lawm­puina thu a thawn tawh a, final an khel lai hi an khua Riga-ah big sceen-in an en khawm hial a ni.

Halep tan a na

Grand Slam nomawi vawi 23 chawi tawh Serena Williams a inlan loh avangin kumin French Open-ah hian rinkai fal an awm bik lo. Kum 25-a upa Halep hian a khelh ṭhat tluan em avangin rinkaiah a insiam, final lut turin set a hloh miah lo.

Kum 2014 final-ah Maria Sharapova hneh lotu Halep hian hnehna chang ni sela chuan Angelique Kerber khumin ranking tharah number 1 a ni dawn a, atan Grand Slam title hmasa ber a ni bawk ang - mahse a beiseina a thamral ta rih.

Halep chuan, "Ka chak loh avangin pawi ka tiin a na hle, chutihrualin tawnhriat thar ṭha tak ka neih phah. Jelena ka lawmpui a, a kum a la naupan em avangin hmabak eng tak a nei," tiin a sawi.

Final Thlirna Tawi
J. Ostapenko Match Statistics S. Halep
3 Aces 0
5 Double Faults 0
55/96 (57%) First Serve % In 73/100 (73%)
7/9 (78%) Net Points Won 2/2 (100%)
8/19 (42%) Break Points Won 6/16 (38%)
54 Winners 8
54 Unforced Errors 10
102 Total Points Won 94
1579.0 Distance Covered (m) 1998.5