A tawp nan an ramah Bolt a chak

Usain Bolt chuan Jamai­ca rama a intlansiak hnuhnung ber tur chu Inrinni zan khan National Stadium-ah a tlan a, second 10.03 chhunga thlengin pakhatna a ni.

Khawvela 100m leh 200m intlansiaka tlan chak ber record siamtu Bolt hian kum 2002 khan junior inelna lamah bul a ṭan. A bulṭanna hmuna a hun tawp a hman leh ṭum hian mipui 35,000 chuang zetin an thlah a ni.

Kum 30-a upa Bolt hi an ramah a intlansiak tawh dawn lo a, August thlaa neih tur World Cham­pionship zawhah infiamna khawvela a mangṭha tawh dawn bawk.

Sprint legend Bolt chuan, "A tawp ni thleng­in 100m intlansiak a nih chuan hlauhthawnna chu la ka nei cheu mai. Mipui khati zat maiin min duhsakna leh min thlahna an lantir kha ka beisei phak lo a, a ropuiin ka tan chuan chawimawina hlu bik a ni," tiin a sawi.