Hun ṭha bawhpelhtu Lazio

Lazio chuan kum 21 chhung an club record lo awm tawh chu nih rualin Serie A match 17 chhung chu chak loh nei loin an kaltluang mek, mahse an khingpui Hellas Verona lakah goal an khung theih loh avangin 0-0 in an inhnehtawk.

Nilaini zan inkhelah Lazio tan Luis Alberto chuan vawi hnih ngawt woodwork a tihper a, mikhual team keeper Thomas Strakosha-a'n anmahni lama goal lut tur ṭha tak takin vawi thum a dan bawk avangin Verona chuan khualmualah point khat hlu tak an hlawh chhuak a ni.

Lazio leh Hellas Verona te hi nikum December thla khan inkhel tur an ni, mahse Laizo leh Juventus ten Italian Super Cup an khelh avangin legaue match an khelh hun hi sawn a ni - Simone Inzaghi naute hian an chunga awm Inter Milan lehpelh theihna hun ṭha nei mah se an bawhpelh rih.

Inzaghi chuan, "Goal khung tumin vawi 27 ngawt kan pet a, a ban vawi hnih kan tih per. Ka naute kha khatiang baka khel chhuak tur khan ka fuih belh thei lo, an theihtawp tak meuh meuh an chhuah.

"Club record kan nihrual thei hi ka lawm a, point thum hlawh chhuak lo mah ila kan khelh danah khan lawmna tur tam tak a awm," a ti. Lazio hi 1999 khan league match 17 chhung tlawm loin an kaltluang a, tun ṭumah hian nihrualin Pathianni zana Parma an hmachhawn hunah record thar siam theihna hun an nei dawn.

Lazio hian league match 22 an khelh tawhah point 50 hmuin table-ah pathumna an ni mek, match khelh zat inangah an chuang hian champion lai Juventus (54 points) leh Inter Milan (51) te an awm. Team pathum an inthlau lo a, nomawi inchuh boruak a sang zel.