England chhandam nan Harry Kane
UEFA World Cup 2018 qualifier-ah British Derby hmuh turin a awm a, Inrinni zan khan Scotland leh England chu inkhel hmuhnawm takah 2-2 in an inhnehtawk. Minute 90 a pelh thlengin Scotland hian 2-1 in hma an hruai a, point thum an hlawh chhuak ngei dawn niin a lang hman - mahse hun pek belh minute thumnaah Harry Kane a inlar a, England tan si phurh sutna goal a khung.
Naupang rual nena khel Germany-in World Cup qualifier-a hnehna an chan vek chhawm nung turin harsatna an tawk lo - an mikhual San Marino chu 8-0 zetin an sawp a, Hoffenheim striker Sandro Wagner chuan hattrick siamin Germany tan player langsar a ni.
British Derby
Hampden Park, Glasgow khawpuia inkhelah Harry Kane captain-na hnuaiah England an inlan a, beisei ang erawhin goal a lut lawk lo. Minute 65-naah Arsenal rawlthar Alex Oxlade-Chamberlain luhtir a ni a, Marcus Rashford thlaktu hian khelmualah minute nga hun a hmang hman chauh tihin England hmahruaina goal a khung nghal.
Team pahnih goal khung harsat dan ngaihtuahin England hi an chak mai dawn niin a lang a, mahse inkhel hmuhnawmna tak tak erawh minute 87 hnulamah a inṭan! Gary Cahill-a freekick chawi rah sengin Leigh Griffiths chuan Scotland tan an si phurh sutna mawi zetin a khung a, ala duhtawk lo! Minute hnih a liam hman awrh tihah Scotland-in freekick dang an hmu leh a, Celtic striker hian mawi zetin a khung nawn - Hampden Park a nghing a, England an hawihai.
A hunah Kane
Kum 2009 hnua a vawi khat nan qualifying match-ah England an tlawm dawn niin a lang hman, mahse England-in Scotland neih loh an nei a, a hming chu Harry Kane a ni. Tottenham striker hian hun pek belh minute thumnaah si phurh sutna goal a khung a, Hampden Park ngawih hun a thleng. Gareth Southgate-a nauten Group F-ah an hmahruaina an chhawm nung zel a, palina Scotland tan erawh beisei tur a tlem ta hle.
England manager Gareth Southgate chuan, "Hnehna kan chan ngeina tur inkhel a ni a, mahse Leigh Griffiths theihna sang tak khan kan result a thlak danglam a ni," tiin Celtic striker a fak a, "Hun harsa tak kara kan thawhchhuah dan khan minti lawm a ni," tiin a naute khelh danah a lawm thu a sawi bawk.
Germany chak nuamsa
World Cup Qualifier-a ngam loh la tawng lo Germany boss Joachim Low-a'n June 17-a khelh ṭan tur Confederations Cup-ah naupang rual a hruai dawn a, World Cup qualifier hi a nau hruai turte enchhin nan a hmang - a chesual lo. San Marino chu 8-0 zetin an sawp a, Wagner-a'n hattrick a siam bakah Arsenal defender Shkodran Mustafi, Paris St-Germain midfielder Julian Draxler, Ajax winger Amin Younes leh Bayer Leverkusen winger Julian Brandt ten goal khat ṭheuh an khung.
Germany boss Low chuan, "Inrintawkna neih belh nan he result hi kan mamawh a, minute 90 chhung khan kan nauten an khel ṭha em em a ni," a ti a, "Wagner tan game pawimawh tak a ni. A taksa a hmang thiamin a goal khung tur dan kha a har em em a, player puitling tak a ni," tiin hattrick siamtu a striker a fak nghal bawk.