Cleveland-in beiseina an la nei

NBA champion Cleveland Cavaliers-in an nomawi kawl lai hloh mai an duh lo. Inrinni zing khan Cavs hian an mikhual Golden State Warriors chu 137-116 in an hneh. Thawhlehni zing dar 6:30-ah NBA Finals Game 5 khelh a ni ang.

Golden State hian tun season playoff-ah hneh loh an la tawng lo a, Cavs laka an tlawm hma hian match 15 chhung an chak zawn tawh; season hmasaa an ngam loh Cleveland lakah pawh final series-ah 3-0 in hma an hruai fal hman. Mahse, Cavs lamin Game 4 an lak ve tak avangin 3-1 a ni chiah - Warriors hian an khelmualah hnehna an chang a nih chuan an champion tho dawn a ni.

Game 4 inkhelah Cleveland hian a tir aṭanga a tawp thlengin inkhel an thunun tluan chhuak. First half-ah chauh pawh point 86 an nei hman a, NBA Finals quarter hmasa pahniha point score hnem ber an ni.

Cavs tan hian Kyrie Irving chuan point 40 score-in player langsar leh pawimawh a ni a, forward LeBron James chuan point 31 a nei ve bawk a, rebound vawi 10 lain assist ṭum 11 a nei bawk.

Kum 25-a upa Irving chuan, "Thih leh dam kara khel kan ni a, tunah hian kan la beidawng lo. Kan hmabak erawh a hautak tawh hle," a ti. James hian Cavs thisenah champion zia a bet tlata a hriat thu a sawi ve bawk.

Cavaliers hian season hmasa khan Golden State lakah 3-1 a an hnufual hnuah hnehna chang letin sulhnu thar an siam tawh. Kuminah pawh 3-0 a an hnufual hnua an chak leh thei a nih chuan NBA history an ziak danglam leh dawn a ni.