Advocaat hoin Netherlands an chak nghal

Netherlands-in coach thar Dick Advocaat kaihhruaina hnuaia an match hmasa berah hnehna an chang nghal - World Cup 2014-a semifinal hial thleng thei ram hian Luxembourg chu 5-0 ngawtin an sawp a, Russia rama World Cup khel turin beiseina an nei thar ve leh ta.

Group A inkhel dangah Swe­den chuan 2-1 in France an lo hneh ve bawk a, World Cup khel lo thei dinhmuna ding hman Netherlands tan beiseina a san belh leh ta sawt tihna a ni nghal bawk - an hmabakah an chunga awm France leh Sweden an la hmachhawn leh dawn.

Holland is Sneijder

Advocaat-a'n a sawi lawk ang ngeiin Wesley Sneijder chu inkhel bul a ṭan tir a, Galatasaray midfielder hian Netherlands tan match 131-a khelhna chiah niin ram tana inlan hnem ber dinhmun a luah nghal - Inter Milan midfielder hlui tan birthday duhthusam a ni a, ram tana inlan hnem ber ni tura Edwin van der Sar a khum bakah hian goal a khung bawk.

Netherlands tan hian Sneij­der bakah Liverpool midfielder Georginio Wijnaldum, Bayern Munich forward Arjen Robben, Spartak Moscow winger Quin­cy Promes leh Tottenham striker Vincent Janssen te chuan goal khat ṭheuh an khung bawk. Netherlands boss Advocaat chuan, "Pakhatna ni ngei turin theihtawp kan chhuah ang," tiin inkhelh zawh a sawi a, World Cup khelh ngei a tum hle.

France ngamtu Sweden

Group A inkhel dangah Swe­den chuan 2-1 in France an barakhaih a, hmahruaitu dinhmun an luah nghal. France tan Olivier Giroud chuan minute 37-naah goal hmahruai a khung a, yard 20 vel aṭanga Arsenal striker goal khung hi 'goal mawi' bik a ni. Mahse, France tan goal mawi ringawtin awmzia a nei lo.

Mualneitu Sweden-in hneh­na chan ngei an duh tih pholangin goal an chhuah aṭanga minute ruk hnu lawkah an si phurh sutna goal Jimmy Durmaz hmangin an khung. Minute 90 thleng goal dang a lut tawh lo a, team pahnih hi point insemin an

ṭin mai dawn niin a lang hman. Mahse, hun pek belh minute thumnaah Ola Toivonen a inlar a, Sunderland striker hlui hian yard 50 vel aṭangin Tottenham goalkeeper Hugo Lloris tihsual zarah chakna goal a khung - kum 2006 hnua World Cup la khel leh lo Sweden beiseina a sang sawt hle.

Portugal tan Ronaldo

Real Madrid forward Cris­tiano Ronaldo-a'n goal khung a bansan hleithei lo. Kum 32-a upa forward hian Latvia 3-0 a an hnehna inkhelah goal hnih a khung a, Porto striker Andre Silva chuan goal khat a thawh ve bawk. Ronaldo-a'n ram tan match 139 khelin goal 73 ngawt a khung tawh a, tun dinhmuna international player zingah Portugal captain aia goal khung hnem hi an awm rih lo.

Group B-ah Portugal hian pahnihna dinhmun an luah chhunzawm zel a, 2-0 a Faroe Islands hnehtu Switzerland chu hmahruaitu an ni. Switzerland tan Zirtawpni zan inkhelah an player langsar pahnih chu chakna hnar an ni a, Arsenal midfielder Granit Xhaka leh Stoke City winger Xherdan Shaqiri-te chuan goal khat ve ve an khung a ni.