PVL semifinal khel tur a chiang ta

Inrinni zan khan GIG Motors Pro Volleyball League chu R. Dengṭhuama Indoor Stadium, Mualpuiah league round khelh zawh a ni. Mipa inelna lamah Ramhlun Sporting Club chuan 3rd MAP 3-1 in an hneh a, hmeichhe team Electric Veng chuan Durtlang 3-1 a hnehin final an lut bawk.

Zirtawpni zana hnehna changtu Ramhlun SC hian semifinal an lut a, MAP an chak loh avang hian TNT chu a sang pali zingah an tel theih phah bawk. Semifinal-ah chuan league hmahruaitu Chhinga Veng leh TNT an inhmachhawn leh dawn a; Hunthar Veng leh Ramhlun SC ten final luh an inchuh bawk ang.

Ramhlun SC hian an league round hnuhnung berah 3rd MAP hmachhawnin set hmasa ber an hloh a, set hnuhnung pathum la letin 20-25, 25-21, 25-22, 25-17 in hnehna an chang.

MAP lam hi Mizo hlanga khel an nih avangin hun pawimawhah team dang an phak lo ṭhin. Zirtawpni zan pawh hian RSC lam hian point 28 hmutu Suresh Chandra Khoiwal Vicky leh point 22 hlawh chhuaktu Hafeel VP te chu an chakna hnar an ni - Vicky hian a vawi hnih nan LG D3 Player of the Night trophy a dawng.

Inrinni zanah hmeichhe legaue round khelh zawh a ni. Electric Veng hian Durtlang lakah 25-20, 21-25, 25-19, 25-17 a hnehna changin GIG Motors Pro Volleyball League final an lut. Mizorama a inlan vawi khatnaah Kolkata aṭanga chah luh Preeti Singh chuan point 25 hlawh chhuakin a team a chak pui a, LG D3 Player of the Night atan thlan nghal a ni.

Mipa inelnaah hian Chhinga Veng chuan match li an khelhah hnehna chang vekin league table hmahruaitu an ni a, an hnuaiah hian Hunthar (7 points), Ramhlun SC (6) leh TNT (3) te an awm. Chak ni hmel hmu lo MAP tan semifinal-ah hmun a awm ve lo a ni.

Hmeichhe team ṭha pathum inel zingah pahnihna ni chungin Electric an tlang a, league vawi hnih ṭheuh khelin tum khat an chak a, point li an hmu. Final-ah 2-3 a an hneh loh tawh Power Department Sporting Club nen an intum ang.