England-in Australia an hnawt chhuak
ICC Champions Trophy-a Australia beiseina tihtawpin a awm ta - Inrinni tlai khan semfinal lut chiang tawh England-in Australia lakah ṭhat an chhuah duh lo a, DL method hman a ngaihna inkhelah run 40-a hnehin Baggy Greens (Australia sawina) hi Champions Trophy aṭangin an hnawt chhuak.
Zirtawpni tlai inkhelah Bangladesh-in wicket ngain New Zealand an barakhaih a, Black Caps an hnawt chhuak. Bangladesh tana Shakib Al Hasan (114 runs) chet ṭhat vangin Australia beiseina tih tlemin a awm nghal a, semifinal lut tur chuan England an hneh ngei ngei a ngai.
Edgbaston-a inkhelah Australia an bat hmasa zawk a, an khel chhe hran lo. Over 50-ah run 277 siamin wicket kua an hloh a, run 71 siama a tawp thleng dam Travis Head chu Aussies tana run siam hnem ber a ni. Head bakah hian Aaron Finch (68 runs) leh Steven Smith (56 runs) an che ṭha viau bawk a, Australia tan semifinal luh beiseina a la nung reng.
England bat hun a thleng a, over 5.4-ah run 35 chiah siamin wicket thum an hloh der tawh - Australia result a zira dinhmun danglam thei Bangladesh thin phu a rang a, Baggy Greens tan beiseina a sang tual tual thung. Ruah surin inkhel a tibuai a, reilote an chawl - hei hian England a pui tih loh rual a ni lo.
Over 5.4-a wicket thum an hloh hnuah England-in wicket khat bak an hloh leh tawh lo. Captain Eoin Morgan-a'n run 87 ngawt vaw chhuakin hruaitu nih a tlin zia a pholang a, Ben Stokes chuan Indian Premier League-a player manto ber a nih chhan pholanga run 102 ngawt siamin a tawp thleng a dam bawk.
Ben Stokes bat tui vanglai over 40.2-ah ruah a sur nawn a, khelh nawn theih a ni tawh lo. DL method hman a ni a, run 40-in England an chak - Australia-in tui lo taka an puanthuah an tel a ṭul phah. England-in over 40 leh ball hniha run an siam zat hi 240 a ni a, wicket li chiah an hloh.
Australia vanduaina chu match thum an khelhah vawi khat mah an khel tluan lo! Ruah sur vangin Australia-in New Zealand leh Bangladesh an hmachhawn ṭumin match tihtawp a ngai a, an khingpui nen point khat ve ve an insem zel a ngaih phah - match tawp berah Australia an vanduai phah a, Champions Trophy an mangṭha ta.