Roreltu Ropui Rafael

Clay court roreltu Rafael Nadal chuan a vawi 10 nan French Open nomawi a chawi ta! Spain tlangval hi Grand Slam-ah vawi 15 a champion-na chiah a ni bawk.

Inrinni zan khawn Philippe Chatrier Court-ah final khelh niin seeded palina Nadal hian darkar hnih leh minute nga chhung lekin world number 3 Stan Wawrinka chu 6-2, 6-3, 6-1 in a sawp.

Kum 1968 hnu lam, profes­sional player-te Grand Slam inelnaa an tel ve theih chin 'Open Era' chinah major tournament pakhata vawi 10 champion thei an la awm ngai lo - player ṭha tam takin kum 49 chhunga an tih theih loh chu Nadal hian a rawn ti thei ta a ni!

Nadal-a Final
Kumin French Open-ah Nadal hian set hloh miah loin nomawi a chawi, match sarih a khelh chhungin game 35 chiah a hloh! A khingpui apiang a sawp vek tihna a ni.

Semifinal-a world number 1 Andy Murray hnehtu Wawrinka hi player ṭha leh hlauhawm tak ni mah se final-ah erawh tih theih a nei lo. Murray a hneh ṭuma winners vawi 87 zet vaw theitu hian Nadal lakah ṭum 19 bak a nei lo - set hmasa bera vawi khat break point a hmuh a chhawr ṭangkai loh hnuah hun ṭha dang a hmuh belh tawh lo bawk.

Thahrui ngah Nadal hian forehand hmangin vawi 14 winners a vaw thei a, a ball vuak a nain a duhna hmunah a dah thei a ni ber, tihsual a neih tlem miau avangin kum 2015 champion Wawrinka-a'n khawng takin defensive game khelh tum viau mah se a inveng zo lo a ni.

Nadal hian set thum an khelh chhungin a service a humthei vek a, Grand Slam vawi thum champion tawh Wawrika service chhuhsak theihna hun vawi 13 a hmuh zinga ṭum ruk chu a tihlawhtling bawk - a inkhelh thiam bikna hmunah dan theih a ni lo.

Kum 31-a upa Nadal chuan, "Khawi hmuan pawh ka theihtawp ka chhuah ṭhin. Mahse, he hmuna ka thil tawn leh neihte nen hi chuan khaikhin theih a ni lo ang. Tennis ka khelh hun chhunga ka hun tawn pawimawh leh hlu ber ka tawnna hmun a ni," tiin a sawi.

Swiss star Wawrinka chuan, "Rafa, sawi tur dang ka nei lo - vawiin hian i khel ṭha takzet a ni. Nang ka hmachhawn thei che hi ka tan chuan chawimawina a tling, nang leh i team te in hlawhtlinnah ka lawmpui che u," tiin a hneh loh Nadal a lawmpuina thu a sawi.

King of Clay
Tennis inelna lian pali zingah Australian Open leh US Open te hard court-a khelh an ni a; Wimbledon hi grass court-a khelh niin Roland Garros chu clay court a ni thung.

Feet 6 leh inch 1-a sang Nadal hian a Grand Slam nomawi hmasa ber atan kum 2005 khan French Open title a la tawh, kha tih lai khan kum 19 mi lek a la ni.

Player langsar Roger Federer, Novak Djokovic, Andy Murray leh Wawrinka te nen an vanglai inrual chho mah se clay-ah bik chuan Nadal el phak an awm lo.

Nadal hian Roland Garros in­buat­saih nan khan Monte Carlo leh Barcelona-ah te a vawi 10 nan a champion tawh bawk - clay bikah hian vawi 53 zet a champion tawh a ni.

French Open-ah hian match 81 khel tawhin vawi hnih chiah chak loh a nei. A hneh loh te hi Robin Soderling leh Djokovic te an ni a, nikum khan a ban rek na vangin third round aṭangin a inhnukdawk bawk.

Nadal record hnaih bertu, he hmuna vawi ruk champion tawh Bjorn Borg chuan match 51 a khelhah vawi 49 hnehna a chang - Nadal hi a sang fal hle.

Mangṭha Toni
Khawvel tennis player ropui ber pakhat chherchhuaktu Nadal-a coach Toni Nadal tan tun ṭum hi Roland Garros-a a hun hnuhnung ber a ni tawh. Philippe Chatrier Court-a final khelh zawh a nih hnuah Toni tan hun siam sak a ni a, an ngai pawimawh hle tih a ni.

Toni hi Nadal tan coach a ni sa­tliah lo a, a patea a nih bakah a inkhelh dan thlenga thlak danglam saktu a ni. Toni hian a fapa kut dinglam hmang thiam hi a khingpuite tana hmachhawn a harsat zawk nan a naupan laiin tennis racket chu a ban vei lamin a humtir, a ti sual lo.

Grand Slam nomawi vawi 15 zet chawi dun tawh tawh Nadal leh Toni te hi tun season bak an inkawp tawh dawn lo.

Grand Slam nomawi chawi hnem lamah Nadal hian Federer (18) chiah tluk loh a nei a, a taksa a hrisel ṭhaa hliam a nei lo a nih chuan inelna lian dangah pawh a la champion leh thei ngeiin a rinawm.