College Veng hmaa ding tur Chaltlang

TṬ Royte Trophy - Inter Branch YMA Football Tournament-ah Chaltlang vawi hnih an champion tawh a, an khingpui tur College Veng an la champion lo.

Vawiin chawhma dar 11:00 hian Lam­mualah inkhelh thiam veng pahnih hi quarterfinal-ah an inhmachhawn dawn a, Zonet leh LPS-ah pekchhuah a ni ang.

A hring nge a pawl?

College Veng ṭantute K. Kawla Stand leh S. Malsawmtluanga Stand-ah an ṭhu dawn a, kawr hring nen an thawk chhuak ang. Chaltlang lamin kawr pawl an ha dawn a, Zomuanthanga Stand leh Zohminga Zote Stand chu an ṭhutna tur a ni.

College Veng manager F. Lal­hmu­chianga chuan, "Kan veng ṭawi­awm turin a tam thei ang ber kan thawk chhuak ang. Hemi pah hian kan ṭhutna leh a chhehvel tihfai kan tum a, garbage bag nen Lammual kan pan dawn," tiin an chak emaw chak lo emaw pawh ni se sulhnu fai tak hnutchhiah an tum thu a sawi.

Thlanga vs Nicky

Chaltlang coach Nicky chuan, "Pu Thlanga hi Mizo coach-ah chuan a ṭha ber zinga mi a ni a, chhawr theih turin Danmawia, B. Thara leh player ṭha a kawl bawk avangin tawh an khirh dawn a. Kan game plan anga kan khelh chuan kan chak turah chuan ka ngai," tiin a sawi a, Bawngkawn an hneh hma pawhin chak a inbeisei thu Vanglaini a hrilh tawh.

Aizawl FC Academy coach Nicky-a'n coaching-ah bul a ṭan chho a, College Veng boss Thlanga erawh player ṭha tam tak chhertu leh Santosh Trophy-a Mizoram champion puitu coach a ni. Coach inang lo tak hi inelna inang khat an khelh miau avangin vawiin hian khaikhin an ni dawn.

Midfield battle

Chatlang-in Bengaluru FC mid­fielder Malsawmzuala an nei a, coach Thlanga hnuaia naupan laia inzir a ni. College Vengin Thlanga fapa Joseph Lalfakzuala an nei thung a, Shillong Lajong midfielder hian naupan lai aṭanga a khelh dun pui ṭhin chu veng tan Lammualah a hmachhawn dawn.

College Veng hian player tawn­hriat nei ṭha R. Laldanmawia, B. Zo­ramthara, KC Lalchhuanmawia, Ramfangzaua, Edenthara, Zothan­mawia leh Lalruatpuia ten kawl avangin rinkai zawk an ni.

Amaherawhchu Chatlang hian College Veng aia player nei ṭha zawka ngaih Bawngkawn an hneh thei a; Mizoram Police defender Lallawmzuala, Aizawl FC wing back Lalramhmunmawia leh season liam taa Aizawl FC Academy tana goal khung tam ber PC Lalhriatpuia an nei tih hriat a ṭha ang.