Hualngohmun an kal zel dawn em?

CYMA Football-ah Hualngo­hmunin quarterfinal an thleng tawh a, amah­erawhchu semifinal lut tur chuan vawiin chawhnu dar 1:30 hian champion rinkai Chanmari an hneh a ṭul ang.

Chanmari hian Jerry Mawi­hming­thanga hmangin team ṭha Republic Vengthlang chu 3-0 in an hneh a, coach Chawngthansanga hote hian inrintawkna sang tak nen Lammual an pan thei ang a, chak tura rin an ni. Amaherawhchu an khingpui tur Hualngohmun hi khaw puma ṭangrual an ni a, Mizoram jersey ha pha Lalramtharmawia leh Lalhmunmawia bakah Chhinga Veng FC player pawimawh Vanlalthanga te an neih avangin dah hniam theih an ni lo.

Hualngohmun hian an match hnuhnung berah Republic Veng an hneh a, an khaw mipuiin an player-te tan phurna an siam sak a, an huaisenna an chakpui. Quarterfinal-ah Aizawl khaw pawn aṭanga dam awmchhun Hualngohmun rilru put hmang fiahin a awm dawn a, an huaisen nawn thei a nih chuan Chanmari nena an inkhel hi hmuhnawm tura ngaih a ni.

Chutihrualin Chanmari vengin tlar­hnungah tawnhriat nei ṭha player Lal­rinchhana, Lalmuanawma leh Lalhriatrenga te an rem thei a, an inhriatchian vek bawk avangin tawn tlan an harsa dawn. MPL coach zinga tawnhriat nei ṭha Chawnga hoten goal an khung hma phawt chuan semifinal kawng a inhawng zau ang.