Champions Trophy; South Africa sawptu India a thiam pali zingah

"Tun aia ṭha zawkin kan bow­ler-ten vawm se chuan hnehna kan chang ang," tih hi Sri Lanka laka India an tlawm hnu lawkah century siamtu Shikhar Dhawan-a'n a sawi a, South Africa lakah chhanna a hmu nghal.

Pathianni tlai khan semifinal lut tura hnehna chan ngai India hian team ṭha South Africa chu wicket riatin an sawp a, an champion nomawi humhim turin India-in hmalam an pan zel. India tan Shikhar Dhawan bawk a langsar a, tun Champions Trophy-a che ṭha tak batsman hian run 78 a vaw chhuak.

Kum 31-a upa Shikhar Dhawan hian tun inelnaah run 271 a siam tawh a, batsman zingah ani aia run siam hnem an awm lo - amah hnaih bertu New Zealand batsman Kane Williamson chuan run 244 a siam a, Black Caps hi hnawhchhuah an ni tawh.

Proteas an chuai

The Oval-ah South Africa an bat hmasa zawk a, bul an ṭan chhe hran lo. Proteas tan hian opener Quinton de Kock chuan run 52 siamin bul a ṭan a, over 17.3-ah run 35 siamtu Hashim Amla vawm out niin India-in an wicket hmasa ber an la ve chauh. Amla-a out hian South Africa-in run 76 an tlin tawh a, khel chhia tia sawi tur an ni hran lo.

Mahse, over 24.2-ah Kock vawm chhuah a ni a, Proteas an tho leh tawh lo - an innghahna ni ṭhin AB de Villiers chu run 16 lek a siam tihin vawm out a ni a, kum 33-a upa batsman hian beisei a phak lo hle - match thum a khelha a run siam belhkhawm chu run 20 chiah a ni! South Africa-in over 44.3-ah run 191 chiah an siam a, wicket an hloh vek!

India an vul

South Africa-in run 191 chiah an siam a, batting line-up nei ṭha India tan um huphurhawm a ni lo. Mahse, over 5.3 lekah Proteas-in wicket lawm tur an nei a, Rohit Sharma chu run 12 chiah a siam tihin a out - Proteas tan beiseina a nung thar a, Sri Lanka laka tlawm hlim India fan-te an hlauthawng.

Mahse, India tan Shikhar Dhawan leh Virat Kohli an lo pen chhuak a, South African bowler ten an chelh lo - Dhawan-a'n run 78 siama a out hnuah pawh Virat Kohli (76 runs) a ding nghet a, Dhawan hnua rawn lut Yuvraj Singh chuan run 23 vaw chhuakin a tawp thleng a dam ve bawk - over 38-ah India -in an target an umpha a, wicket hnih chiah an hloh avangin hnehna an chang chiang hle.

Eng nge an sawi?

India captain Virat Kohli chuan, "Kan bowler-ten an vawm ṭha em em a, chutihrualin fielding lama kan khelh ṭhat dan kha sawi hmaih theih a ni lo bawk. Inkhel pumpuia kan khelh danah lawmna tur hlir a ni a, kan hun neih ṭhat kan bawhpelh miah lo," tiin tihsual an neih loh vanga chak an nih thu a sawi.

South Africa captain AB de Villiers,"Tournament mangṭha dan atan chuan a duhawm lo takzet, kan rilru a hnual em em a, mahse India kha an khel ṭha em a ni. Ka run out hma kha chuan kan khel ṭha viau hman a, mahse vawiinah hian team ṭha zawk kan ngam lo a ni," tiin chak phu zawkin hnehna an chan thu a sawi.

Hmabak

Champion lai India hian Ni­ngani tlaiah semifinal an khel lehnghal dawn a, Edgbaston-ah New Zealand hnawt chhuak­a semifinal in­hlang­kai thei Bang­la­desh nen final luh an inchuh dawn a ni.

Nimin tlai khan Sri Lanka leh Pakistan an inhmachhawn a, he inkhela chak zawk hian vawiin tlai dar 3:00 semifinal-ah England an hmachhawn leh­nghal a ṭul dawn. He chanchin buatsaih a nih lai hian an result erawh kan hre hman lo.