Chhum zing vangin CYMA Football khel thei lo

Nimin khan TṬ Royte Trophy - Inter Branch YMA Football Tournament chu chhum zingin a tibuai a, quarterfinal match hnih khelh hun sawn a ni.

Quarterfinal match hmasa berah Ramhlun South leh ITI Veng an inhmachhawn a, minute 61-naah tihtawp niin vawiin chawhma dar 9:30-ah khelh hmabak hi khelh chhunzawm tur a ni. Champion rinkai Ramhlun South hian minute 56-naah Vanlalthlamuana hmangin goal an khung hman a, minute 29 khelh hmabakah HC Zarzoliana hote dinhmun a ṭha zawk.

Rematch-ah hian team pahnih hian player ngai an khelhtir tur a ni a, ITI Veng hian minute 54-naah substitution an siam hman avangin player pahnih bak an thlak thei tawh lo. Ramhlun South erawh starting eleven ngai bawkin bul an ṭan leh thei dawn a, veteran player Samson Ramengmawia bakah tawnhriat nei ṭha player Malsawmfela leh Zohmingliana Ralte ten tha tharin an khel thei ang.

Thlirna dang aṭang chuan ITI Veng an vannei zawk a, game plan thar nen Ramhlun South an nawr let dawn. An inthlauhna hi goal khat chauh a nih avangin chhum zing hi semifinal kawngka hawn saktu a ni thei bawk.

Match hnuhnung zawka Chhinga Veng leh Salem Veng erawh match ṭan hman a ni lo a, June 16 zing dar 7:00 khian RG Stadium, Mualpuiah an khel ang. Inkhelh hun chungchanga thutlukna siam turin branch pahnih remtihna lak a ni.

CYMA Football semifinal hi double leg a khelh tur a ni a, first leg hi June 19, Thawhṭanniah khelh tur a ni. Hei vang hian Chhinga Veng emaw Salem Veng emaw chuan hahdam hun an nei tlem ang.