Asian Cup Qualifier Zaninah Mizo tamna India inlan dawn
Mizo panga awmna India chuan zanin dar 8:00 hian AFC Asian Cup 2019 qualifier an khel dawn a, Sree Kanteerava Stadium, Bangalore-ah Kyrgyzstan an mikhual ang. Inkhel hi Star Sports 1 chuan live-a en theih turin a pe chhuak dawn a ni.
India squad-ah hian Mizo panga, Mohun Bagan striker Jeje Lalpekhlua, Bengaluru FC striker Daniel Lalhlimpuia, Shillong Lajong midfielder Isaac Vanmalsawma, DSK Shivajians defender Jerry Lalrinzuala leh Aizawl FC defenderLalruatthara te an awm a, Hnahthial tlangval Jeje chu inkhel bul ṭan tura beisei niin India tan innghahna a ni leh ang.
Group A-ah India hian match khat khel tawhin an match hmasa berah Myanmar chu khualmualah 1-0 in an hneh a, Russian coach Aleksandr Krestinin enkawlna hnuaia khel Kyrgyzstan hian Macau chu 1-0 thoin an hneh ve tawh bawk.
Kyrgyzstan tan tlarhmaah Mirlan Murzaev chu innghahna tur a ni leh dawn a, Turkish third division club Usakspor striker hi tlarhnunga inkawp tura rin Pritam Kotal, Sandesh Jhingan, Anas Edathodika leh Narayan Das ten an ven uluk a ṭul dawn.
India tan tlarhmaah Jeje Lalpekhlua leh Robin Singh chu inkawp tura beisei an ni a, midfield aṭangin Jackichand Singh, Eugeneson Lyngdoh leh Sunil Chhetri ten an thlawp bawk ang - captain Chhetri hi Nepal lakah khan chawlh hahdamtir a ni a, a lakah beiseina a sang ang.
Kyrgyzstan tlarhnung hi Bahraini Premier League club Riffa defender Azamat Baymatov hona hnuaia inkulh tur an ni dawn a, India tan a match hnuhnung 11-a goal 10 khungtu Mizo tlangval Jeje-a'n goal khung turin ṭum dang zawng aia a khelh ṭhat a ṭul dawn a ni.