Zaninah semifinal thawh khatna

GIG Motors Pro Volleyball League hmawr bawk a hnai, zanin dar 8:00 hian R. Dengṭhuama Indoor Stadium, Mualpuiah semi­final hmasa zawk khelh tur a ni a; Chhinga Veng leh TNT, Muanna Veng an inhmachhawn ang.

Mizoram Volleyball Associa­tion hnuaia inelna lian PVL-ah hian mipa team panga an inel a, league round-a an inkhelh kual hnuah a sang paliin semifinal an lut.

MVA Invitation Tournament champion Chhinga Veng hi season hmasa khan PVL-ah an tel lo. Kumin hi an kum khatna a ni, team thar ni mah se an mikhual lo hle. League round-ah an kingpui pali an hneh vek, zanina an hmachawn tur TNT ngei pawh hi 3-0 a an sawp tawh avangin final lut tura rinkai an ni.

Chhinga Veng tan State pawn player Mandeep Singh leh Gurinder Singh te chu player pawi­­mawh an ni leh dawn, anni pahnih dan hi TNT tana hna pawimawh a ni ang.

Tualchhung volleyball-a team ṭha ni ṭhin TNT hi tun sea­son-ah an tlahniam deuh, league round-ah khan vawi khat chiah chakni hmel an hmu. Chak nei lo 3rd MAP chiah an hnuaiah an awm, final lut tur chuan thih thaa an ṭan a ngai ang. Tawnhriat nei ṭha Laldensanga'n a naute a fuih ṭhat a ngai dawn hle a ni.