World Cup Qualifier ; Harsatna tawk lo Italy leh Spain

UEFA World Cup qualifier 2018-ah ram langsar Italy leh Spain-in hnehna chang turin harsatna an tawk lo - ram pahnih hian Pathianni zan khan an khingpui ve ve an hneh a, Group G-ah awm dunin an point hmuh zat a in ang mek. Italy hian Liechtenstein chu 5-0 in an sawp a, Spain-in Macedonia 2-1 in an hneh bawk. Europe World Cup qualifier chanchin a ngaihnawm zel.

Europe ram langsar zingah Croatia an chak zo lo a, Iceland khelmualah 1-0 in an tlawm. Hetihlai hian Turkey-in World Cup an beiseina an chhi nung ve leh a, khualmualah Kosovo chu 4-1 ngawtin an sawp. Croatia hian Group I-ah Iceland nen point hmuh zat inangah goal difference vangin hma an hruai a, an hnuaiah hian point 11 hmu ve ve Turkey leh Ukraine an la awm cheu - group khat aṭangin World Cup hmun ruak chiang sa 'pakhat' a awm a, pahnihnain playoff an khel dawn.

Goal = Italy

Italy-in an mikhual Liech­tenstein lakah vawi 37 ngawt goal shot an nei a, first half-a an goal khung zat erawh goal khat chiah a ni! Azzurri (Italy sawina) tana goal hmasa ber hi Lorenzo Insigne-a'n minute 35-naa a khung a ni a, Manchester United nena sawizawm hlawh mek Andrea Belotti chuan minute 52-naah a chhunzawm ve leh bawk. Italy goal dang erawh minute 70 hnu lama lut vek a ni tawh a, Eder, Federico Bernardeschi leh Manolo Gab­biadini ten goal khat ṭheuh an khung.

Azzurri manager Giampiero Ventura chuan, "First half kha kan tan chuan zirlai ṭha tak a ni a, goal khung kan tum luatah chetsual theih a ni tih kha kan zirchhuah chu a ni. Second half-ah erawh ruahman angin engkim a kaltluang thung," tiin inkhel a thlir kir - Juventus goalkeeper Gianluigi Buffon chuan Italy tan si ban a nghak a, shot dan tur a nei miah lo! Ram tan a match 169-na niin mahni ram tana inlan hnem player zingah pangana a ni.

Spain tan Costa

Macedonia khelmualah Diego Costa-a'n Spain tan goal a khung a, an ram hi 2-1 in hnehna a chanpui. Spain tan Manchester City midfielder David Silva chuan minute 15-na lekah goal hmahruai a khung a, Brazil-a piang, Spain tana inlan thlang zawk Costa chuan minute 27-naah a chhunzawm ve leh bawk. Macedonia tan Stefan Ristovski chuan minute 66-naah beisei loh takin goal khat khung ve mah se Spain an ṭang tlang a, an chak.

Group G-a match li khelh tur la awmah Spain leh Italy point hmuh zat a in ang a, team pahnih hi September thlaah an la inhmachhawn leh dawn - hei hi group G aṭanga automatic-a World Cup khel tur zawnna anga ngaih theih tur a ni dawn a, boruak a 'hot' chho zel.

Croatia chak lo

Group I-ah hmahruaitu Croatia-in chak beisei chungin Iceland pan mah se an beisei ang result an hlawh chhuak zo lo a, 1-0 in an tlawm. Croa­tia hian hnehna chang nise chuan point li a hma hruai fal thei tur an ni a, mahse Hordur Magnusson an ngam lo. Championship club Bristol City defender hian minute 90-naah goal awmchhun a khung a, Croatia-in a chhanletna an nei lo.

Turkey player chhuanvawr Arda Turan-a'n journalist kut a thlak avanga an hremna pawm duh loa rama tana inkhelh a chawlhsan thu a puan hnu lawkah Turkey an inlan a, Barcelona midfielder tel lo pawhin harsatna an tawk lo - Kosovo chu khualmualah Volkan Sen, Cengiz Under, Burak Yilmaz leh Ozan Tufan goal khung hmangin 4-1 in an sawp.

Wales an chuai?

Euro 2016 semifinal an luh hnuah Wales-in an chet ṭhat an chhawm nung hleithei lo a, Serbia nen 1-1 in an inhneh­tawk. Wales tan Aaron Ramsey chuan minute 35-na lekah penalty hmangin a 'chip' lut a, goal dang a lut lawk lo. Hrem vanga Gareth Bale chhawr thei lo Wales an chak mai dawna a lan hnu, minute 17 chauh a awm tawh tihin Aleksandar Mitrovic chuan Serbia si phurh a sut a, hma an hruai chhunzawm zel - Wales erawh pathumnaah awmin an dinhmun a chhe ta hle.

Wales manager Chris Coleman erawh a beidawng duh lo. Kum 47-a upa manager chuan, "Match li khelh tur la awmah kan chunga mite point liin kan la phak lo tih hi miin an hria a, min huphurh pui a ni. Mahse, kan inkar zauna hi kan sawr zim theih leh theih loh min zawt dawn a nih chuan ka chhanna chu '100% in kan thei ang' tih hi a ni. Kan hmaa chona inchhawp te hmachhawn turin kan inbuatsaih zel a ni," a ti a, World Cup 2018 khel tura Russia kal ngei a tum.