Catalunya-ah pawh Dovizioso bawk

Pathianni zana MotoGP tlan zawk tak Catalunya Grand Prix-ah Andrea Dovizioso chu pakhatna a ni. Italian rider hian intlansiak hnuhnung pahnihah hnehna a chan tak avangin rider championship-ah pahnihna dinhmun a luah.

Ducati rider Dovizioso hnungah hian champion lai Marc Marquez a thleng a, pathumna chu Dani Pedrosa a ni a. Kar hmasa khan Dovizioso hian an rama neih Italy Grand Prix-ah hnehna a chang tawh bawk.

Kum 2010 khan Aragon leh Motegi-ah Ducati rider Casey Stoner-a'n hnehna a lo chang tawh, Stoner-a hnuah Dovizioso hi Ducati rider zinga hetiang dinhmun luah leh thei hmasa ber a ni. Kum 31 mi Dovizioso hian rider championship-ah point 104 hmuin pahnihna a ni a, a chungah point 111 hmutu Maverick Vinales a awm.

Catalunya-ah Yamaha team-in beisei an phak lo. Season tir intlansiak hmasa pahniha hnehna chang thei Vinales chu 10-na a ni a, a teammate Valentino Rossi chu pariatna a ni bawk.

Dovizioso chuan, "Boruak awm dan leh tlankawng dinhmun avang khan intlansiak a harsain hriatthiam a harsa hle. Hnehna chang tur chuan chetsual loh a pawimawh tih ka hria, fimkhur tak leh tluang taka ka tlan chhuah theih avangin hnehna ka chang hram," tiin a sawi.

MotoGP intlansiak hi June 25-ah neih leh a ni dawn a, Dutch Grand Prix tlan a ni ang.