Canada-ah Hamilton a ropui
Lewis Hamilton chuan Canadian Grand Prix-ah a vawi ruak nan hnehna a chang a, Formula 1 driver championship hmahruaitu Sebastian Vettel nen an inkar chu point 12-ah a ti zim leh ta.
Pathianni khan Gilles Villeneuve Circuit-ah Canadian GP hi tlan a ni a, Mercedes driver Hamilton hian pole position aṭanga bul ṭanin a tir aṭanga a tawp thleng intlansiak a thunun - a hnungah hian a teammate Valtteri Bottas a thleng ve bawk.
World champion vawi li ni tawh Vettel chu intlansiaktir lama Max Verstappen nen an intihpalh avangin a car siamṭhat a ngaih phah a, 18-naah a tlak hniam phah. Mahse, German driver hian huaisen taka bei letin palina dinhmun a luah thei a ni!
Canada-a intlansiak vawi 10 a hmachhawn aṭanga vawi ruk hnehna chang thei Hamilton chuan, "Formula 1 car ka khalh hnuah he hmun hi pole position ka channa hmasa ber leh hnehna ka channa hmasa ber a ni a, kum 10 hnuah ka bul ṭanna ang bawka thil a thleng leh thei hi ka lawm hle," tiin a sawi.
Kum 32-a upa Hamilton hian point 129 hmuin championship-ah pahnihna a ni a, a chungah hian point 141 hmutu Vettel a awm. Ferrari leh Mercedes driver pahnihte hi nomawi inchuhin an la inel dawn chauh niin a lang - June 25 khian Azerbaijan Grand Prix an tlan leh ang.
Canadian GP Results
Pos Hming Ram Team
1 Lewis Hamilton Gbr Mercedes
2 Valtteri Bottas Fin Mercedes
3 Daniel Ricciardo Aus Red Bull
4 Sebastian Vettel Ger Ferrari
5 Sergio Perez Mex Force India
6 Esteban Ocon Fra Force India
7 Kimi Raikkonen Fin Ferrari
8 Nico Hulkenberg Ger Renault
9 Lance Stroll Can Williams
10 Romain Grosjean Fra Haas