Mexico leh US inhnehtawk

CONCACAF aṭanga World Cup khelh tum Mexico leh United States te chu nimin zing khan 1-1 in an inhnehtawk.

Estadio Azteca-a inkhel­ah mikhual US tan Michael Bradley chuan minute rukna lekah yard 35 aṭangin goal ropui a khung. US captain hian halfway line-ah Mexico player ball inpek kualnaah tla zepin, ball per a um pahin keeper awmna a en zui a, yard 35 aṭangin nalh takin a pet lut.

Mexico hian Arsenal striker hlui Carlos Vela hmangin minute 26-naah siphurh an sut a, goal dang a lut tawh lo.

CONCACAF aṭang hian World Cup 2018 khelh tum ram 35 an awm a, tunah hian team parukah an inthifiam chho tawh. North America aṭang hian a sang pathum chu Russia pan turin an tling nghal dawn - palina chuan South America lama pangana nen playoff an khelh a ngai dawn.

Mexico hian match ruk an khelh aṭanga point 14 hmuin hmahruaitu an ni a, an hnuaiah hian point riat hmu pahnih Costa Rica leh United States te an awm bawk.