Zanin dar 8:00-ah CYMA Volleyball hmeichhe final ; Bungkawn Vs Kolasib Diakkawn

Central YMA leh Mizoram Volleyball Association-in an buatsaih D3 Amrit Cement 22nd Inter Branch YMA Volleyball Tournament 2022 chu a hmawr an bawk hnai ta.

Zanin dar 8:00 hian R. Dengṭhuama Hall, Mualpuiah hmeichhe final khelh a ni dawn a, Bungkawn leh Kolasib Diakkawn ten nomawi an inchuh ang. Mipa final hi July 30, Inrinni zan dar 8:00-ah khelh leh tur a ni.

Hmeichhe final inkhelh ṭan hma hian programme tawi a awm dawn a, Central YMA general secretary Prof Lalnuntluanga leh Central YMA Sports Sub Committee chairman R. Lalrinmawia (Marina) ten thusawina hun an nei dawn a, minute nga ve ve chauh dahsak an nih avangin a rei dawn lo.

Semifinal hmuhnawm
Nimin khan semifinal hmasa zawk khelh a ni a, Bungkawn leh Armed Veng South an inkhel a, record nei ṭha zawk Bungkawn an ding chang ta zawk. Bungkawn hian set hmasa bera 25-14 in an la a, Armed Veng South-in set hnihna 25-19 in la mah se Bungkawn-in 25-14 leh 25-22 a set hnih an lak chhunzawm avangin hnehna an chang. Bungkawn player F. Lalparmawii chu player of the match-a thlan a ni.

Semifinal hnuhnung zawka Kanan leh Diakkawn inkhel a hmuhnawm hle. Set tinah team pahnih an intluk tawk a, a tawpah Diakkawnin 25-20, 18-25, 25-23, 25-20 in hnehna an chang. Diakkawn captain Lalmuanpuii chu player of the match-a thlan a ni.

Final Kalkawng
Bungkawn hi first round-ah an bye a, second round-ah Mualpui (3-0) an hneh a, round of 16-ah Thingdawl Hmar Veng (3-0) an hneh leh bawk. Quarterfinal-ah Dawrpui Vengthar 3-0 in an hneh leh a, semifinal lut turin set khat pawh an hloh lo. Nimin inkhelah Bungkawnin AVS lakah set khat an hloh a, match li khelha set khat chauh an hloh hian an ṭhatzia a pholang.

Kolasib Diakkawn hian bul ṭan nan Republic Veng (3-0) an hneh a, Lungmuat leh Thenzawl Kanan te 3-0 bawkin an hneh chhunzawm. Final-a an hmachhawn tur Bungkawn ang thoin semifinal lut turin set an hloh lo. Semifinal-ah erawh Kolasib Diakkawnin set khat an hloh a, dem theih an ni lo - CYMA Volleyball-a record nei ṭha ber Kanan chu 3-1 in an hneh.

A hmuhnawm dawn
Mizoten volleyball an ngaihlu a, Pro Volleyball-a inkhel entu zatin an ngaihlu tih a nemnghet. CYMA Volleyball-ah pawh first round aṭangin entu an ṭhahnem a, final-ah an tlem thut dawn lo a, team ṭha pahnih Bungkawn leh Kolasib Diakkawn an inkhelh dawn avangin an ṭhahnem sawt ang.

Vawi ruk champion tawh leh champion lai Bungkawn hian hnehna an chang a nih chuan champion tam lamah Kanan an nihrual dawn. Tun ṭumah hian PVL-a player pawimawh ni pha Melody Lallawmkimi, RK Lalfakmawii, FP Lalduhkimi leh F. Lalparmawii te an kawl a, team ṭha zawka ngaih an ni.

Kolasib Diakkawnin PVL-a player pawimawh Lalmuanpuii, Flora Lalrinmawii leh Lalrinzuali te an nei ve bawk a, chakpui tham an ni. Aizawl khaw pawnah chuan Champhai hmeichhe team chiah CYMA Volleyball-ah an champion thei a, Kolasib Diakkawnin Champhai hnungzuiin Kolasib-ah nomawi hawn an tum ang.